Trồ tơngai duh, ro kơnrañ jŏ jòng gam lơh gĭt nđờ rhiang rbô lồ brê tàm jơh ală 10 kơnhoàl, ƀòn dờng bơh càr Kon Tum dê kong mờ jơnau pơhìn gơtìp ồs sa uă ngan. Ală cau tờm brê neh ai tai mpồl cau nàng gàr brê.

Ồng Ngô Tùng Khoa, Phó Kwang ătbồ Kông ty Trăc ñiệm Hữu hạn Dồ nă să broă lơh brê bơnơm Ngọc Hồi là tiah ătbồ mờ sền gàr rlau 23 rbô 400 lồ brê, pà gĭt: broă rơcăng lài kơryan ồs sa brê gam geh mpồl ơn lài khà dùl. Tơrgùm jơh pràn rơcăng lài kơryan ồs sa brê, ală mpồl cau tờm brê tàm càr Kon Tum pal kong mờ jơnau “siơ̆u nđăp ờ tơl tơnơ̆”, rơndăp rơndồl kal ke: Bă brê dờng mơya mpồl lơh broă lơh ătbồ sền gàr brê dồ êt ngan; phan ngui crùh ồs sa brê ƀa rah ƀa rài ngan. Broă gròi sền cau lik mŭt tàm brê kung bè gròi sền broă ngui ồs kung ờ pràn sơl tài bơh uă bă brê rềp nhàr bal mờ gùng lòt, mìr sre làng bol dê.