Gơnoar atbồ càr gam tơrgùm lam lơh uă broă lơh rơcang lài kơryan tơrlah ù; rơcang lài bơklơn ntrờn làng bol nàng tơrmù tus khà lơyah ngan rlau jơh hoàc huơr. Ală ngai do, làng bol xã Dà Knàng, kơnhoàl Dam Rông, càr Lâm Đồng kis tàm bơta ờ suk ngan tài pơhìn tơrlah ù. Sùm 2 dơ̆ tơrlah ù lơh 3 nă cau chơt tàm ală ngai 15/7 mờ 20/7, bulah neh geh gơnoar atbồ tàm ƀòn lơgar bơsong jơnau gơ lời wơl, tồt ƀàng tơngkah lài tiah ngòt rơngơt mơya jơnau pơhìn tơrlah ù kung gam geh sùm.

Bal mờ kơnhoàl Dam Rông, uă tiah bơh càr Lâm Đồng dê neh geh dồ ròt anih tơngkah lài pơhìn tơrlah ù tàm nhai mìu do. Tàm hơ̆, ƀòn dờng Dà Làc geh 61 anih mờ ƀòn dờng Bảo Lộc geh 55 anih ngòt rơngơt. Tềng đap bơta trồ tiah mìu dờng jŏ jòng tàm uă tiah, Anih duh broă làng bol càr Lâm Đồng sùm geh sră nggal sồr ală anih lơh broă, mpồl lơh broă mờ Anih duh broă làng bol ală kơnhoàl, ƀòn dờng tơrgùm lam lơh uă broă lơh nàng bơsong, rơcang lài kơryan tơrlah ù.