Geh mờr 250 nă kwang bàng ala măt bơh rơlao 65 rơbô nă đoàn viên kông đoàn càr Lâm Đồng neh tus pơrjum. Bŭ lah gơtìp mờ uă bơta kal ke tài gơrềng bơh kòp Kovid-19, mơya ală kấp kông đoàn càr Lâm Đồng neh lơh ngan lơh geh cồng nha ală kơnòl broă, broă lơh, lơh gơs mờ sơrlèt ală khà broă mờ Nghị quyết Pơrjum dờng dơ̆ IX Kông đoàn càr neh ai.

Tàm hơ̆, geh pơnrơ ngan là lơh niam gơnoar ala măt, drơng gàr, sền gàr gơnoar tờm, bơta kwơ di mờ adăt boh lam, di pal bơh kông ñân, viên cứk, cau lơh broă dê. Mùl màl neh geh mờr 79 rơbô nă đoàn viên, cau lơh broă geh còp să, pà phan bơh broă lơh “Satềp tơrgùm bal”; 46 rơbô 500 nă cau geh blơi phan, ngui broă lơh drơng ala bơh 85 mpồl lơh sa kă bro mờ priă sa ờ uă; dong kờl lơh pa, lơh niam wơl 118 nơm hìu ai đoàn viên, cau lơh broă geh rài kis gơtìp kal ke in... Pơrjum dờng neh pồ geh Mpồl Đơng lam Liên đoàn Lao động càr Lâm Đồng khoă X, tơngai lơh broă bơh nam 2023 tus 2028 geh 32 nă kwang bàng.