Lam bol añ lòt tàm gùng bê tông niam ngan, lòt gan ală jơng bơnơm bal mờ dà tơlir dờng ơning ơnàng bơh ală mìr kơphê, suơn tờm chi sa plai gơs ngan, bi Ka Lèm, kòn cau K’Ho, ơm tàm ƀòn Đăng Rách, xã Gung Reh, kơnhoàl Di Linh, càr Lâm Đồng pà gĭt, kơnờm gùng lòt rê ƀuơn ƀoài ngan, phan bơna, phan lơh geh bơh lơh sa suơn sre jun pơndiang ƀuơn ngan, ƀòn ngài geh lòt rềp mờ tiah tờm xã dê den tàng rài kis lơh sa bơh làng bol dê neh bơtàu tơnguh uă ngan pơndrờm mờ lài do. Hìu lơi kung tryang tryồng lơh sa, ờ gam geh bồ tơngoh kơlôi sơnơng, kơl dìng wơl tàm bơta dong kờl bơh Đảng mờ Dà lơgar dê tai.

Bi Ka Lèm, đơs: "Đảng, Dà lơgar neh sền gròi dong kờl oh mi cau ùr, tàm hơ̆ geh oh mi cau ùr làng bol kòn cau dùl ết nă cau đơs is tàm broă lơh broă sa nàng ngai sơlơ bơtàu tơnguh. Gĭt broă lơh sa nàng bơtàu tơnguh rài kis lơh sa bơh hìu bơnhă dê, ƀòn lơgar dê sùm pơgồp bơnah tơn jơh jơgloh tơrmù rƀah dùl bă kơ̆ kơl jap. Ưn ngài Đảng, Dà lơgar neh sền gròi tus rài kis làng bol kòn cau dùl ết nă cau in, bơto pơlam broă lơh sa nàng bơtàu tơnguh rài kis hìu bơnhă mờ ƀòn lơgar in".

Xã Gung Reh rlau 4 lồ ù lơh sa suơn sre, tàm hơ̆ geh 1 rơbô 600 lồ kơphê, rlau 200 lồ kòi sre là 2 phan tam tờm ngan. Ală nam do, xã Gung Reh, gam tam uă gĭt nđờ rơhiang lồ tờm chi sa plai ndai, bè:ƀơ, sầu riêng, mắc ca, plai màk, tờm zơu ròng tu mờ uă bă ù tam ală bơta phan lơyah tơngai. Kơnờm sền gròi tam gơl rơndăp tăp sèng phan tam jat gùng dà tơnguh uă priă lơh geh bơh phan bơna dê, ai ală bơta sơntìl phan tam pa geh cồng nha tơnhào uă mờ bơkah, niam uă tàm broă tam phan, mơkung ngui ală broă chài tam phan, den tàng priă lơh geh tàm dùl bă ù am phan bơh xã Gung Reh dê kờp bal mờr 150 tơlak đong dùl lồ dùl nam, gơguh 30 tơlak đong dùl lồ pơndrờm mờ 2 nam lài. Khà hìu bơnhă rƀah neh gơmù gam 5%.

Jat ồng K’Keo, Ƀí thư Ci ƀộ thôn Hàng Làng yal, rài kis làng bol dê tam gơl loh làng ngan là kơnờm bơta sền gròi bơcri priă bơh Đảng mờ Dà lơgar dê bè tơl ală bơta. Jat ồng K’Keo, đơs: “Ủy ƀan Ñân zân xã sền gròi ngan, kwang bàng lòt tơn tàm ƀòn nàng lùp còp, pơndờm pơnđiang, bơto pơlam dong kờl, bơto ai làng bol in gĭt broă lơh sa kơnờm bơh hơ̆ bơta gĭt wă bơh làng bol dê ngai sơlơ bơtàu tơnguh. Làng bol geh tơl kòi phê mờ rài kis phan bơna ngai sơlơ bơtàu tơnguh pơndrờm mờ lài do. Làng bol ưn ngài Đảng, Dà lơgar uă ngan, ngan là Kwang bàng xã neh jơh nùs jơh tồr bơto pơlam làng bol tàm ƀòn in gĭt tàm broă lơh broă sa nàng geh rài kis niam bè ngai do”.

Ồng Trịnh Văn Dũng, Củ tịc Ủy ƀan Ñân zân xã Gung Reh pà gĭt, xã geh rlau 1 rơbô 600 hìu bơnhă, geh mờr 7 rơbô nă cau, tàm hơ̆ làng bol kòn cau dùl ết nă cau geh rlau 45%. Bal mờ bơta sền gròi, ai lài bơh Đảng mờ Dà lơgar dê tàm broă lam lơh jat uă broă lơh dong kờl, broă lơh, rơndap broă lơh bơcri priă tàm tiah làng bol kòn cau dùl ết nă cau, bơh bơta tam klăc bal, sơm bat tê bal, dùl nùs bal bơh jơh bal ală anih lơh broă cíñ trị mờ làng bol dê neh lơh geh bơta pràn tơrgùm bal, dong xã hời rơ hời sơr lèt gan kal ke, tơrgùm bơtàu tơnguh lơh sa mờ kơ̆ kơljap cíñ trị. Nam 2016, xã Gung Reh geh dờp là xã lơh sir broă lơh ƀòn lơgar pa.

Ồng Trịnh Văn Dũng đơs nền: “Jơh ală anih lơh broă cíñ trị neh mut lơh bal mblàng yal, hòi jà đoàn viên, cau tàm mpồl tus bal mờ làng bol rề ơnàng ală broă lơh, broă lơh niam, broă lơh bơceh lơh nàng lơh geh bơta tờm mờ rề ơnàng làm uă. Ai gơnoar broă tờm là làng bol, cau lơh mờ dờp geh bơta dong kờl tơn den làng bol neh geh bơta tam gơl uă ngan. Ală broă lơh bơtàu tơnguh lơh sa suơn sre, tam phan lơh sa suơn sre, tam gơl sơntìl phan tam, ngui bơta gơguh jak măi mok pa geh lam lơh geh cồng nha. Tus tŭ do priă lơh geh bơh làng bol neh gơguh bơh 38 tơlak đong gơguh tus 48 tơlak đong dùl nă cau dùl nam. Hơ̆ là ală bơta tam gơl loh làng, rài kis bơh làng bol dê neh geh gàr niam, iang nùs bơcri priă bơtàu tơnguh lơh sa hìu bơnhă”.

Tŭ do, xã Gung Reh neh bơh sơn rờp lơh geh ală anih lơh bal tam phan mờ tăc bro phan lơh geh bơh lơh sa suơn sre. Tàm ù tiah xã kung neh geh ală broă lơh ròng ka dà mrềt, ròng uă mpồl kơnrồ poăc cèng wơl priă lơh geh uă ngan. Ngan là, xã gam bơtàu tơnguh lơh sa- lòt nhơl tềng hơđơm mƀur brê, lòt nhơl mpồl bơtiàn pơgồp mờ bơhiàn niam bơnĕ niam chài bơh kòn cau K’Ho dê. Jat tàm ală cồng nha neh geh bal mờ ală gùng dà pơlam di ngan, bơta ring bal uă bơh jơh bal ală anih lơh broă cíñ trị mờ làng bol dê, pin dờn là xã Gung Reh rơ̆p lơh geh jơnau kờñ xã ƀòn lơgar pa bơtàu tơnguh uă tàm nam 2024.