VOV4.K’ho - Tàm bàr ngai bơh ngai 21 tus ngai 22 nhai 09, Đoàn ơruh pơnu Kộng sản Hồ Chí Minh càr Dăk Nông neh bơyai lơh Pơrjum dờng dơ̆ 4, tơngai lơh broă bơh nam 2022 tus 2027, mờ broă tus bal bơh 200 nă kwang bàng ala rơlao 157 rơbô nă đoàn viên ơruh pơnu.

Đoàn ơruh pơnu càr Dăk Nông neh ai geh 12 mpồl broă, 8 rơndăp broă, broă lơh tờm tàm tơngai bơh nam 2022 tus 2027

Jăt jơnau yal tàm Pơrjum dờng, tơngai lơh broă pa do, đoàn ơruh pơnu càr Dăk Nông neh lơh geh mờ sơrlèt 11 tàm 12 khà broă. Geh pơnrơ ngan là tàm broă tus bal bơ̆t bơtàu ƀòn lơgar pa, ală kấp ƀộ Đoàn neh lơh jăt mờr 7 rơbô broă lơh, bơnah broă ơruh pơnu mờ kờp jơh rơlao 38 tơmàn 430 tơlăk đong. Ơruh pơnu gùt càr neh bơyai lơh git nđờ rơbô broă lam sồr mờ lik sền gàr tiah kis, lơh kloh siồ siă, tam pa rơlao 700 rơbô tờm chi ală bơta; lơh pa, lơh niam wơl 127 anih pơrjum, nhơl chờ ai ơruh pơnu, kơnòm pa tào, kơnòm dềt in, lơh jăt ală broă dong kờl kơnòm pa tào gơtìp kal ke mờ khà priă rơlao 15 tơmàn đong.

Mờ jơnau geh ai lơh: “Ơruh pơnu càr Dăk Nông lam lài, kơ̆p kờñ, bơceh lơh, tơnguh bơtàu”, Pơrjum dờng đoàn ơruh pơnu Kộng sản Hồ Chí Minh càr Dăk Nông dơ̆ 4, tơngai lơh broă bơh nam 2022 tus 2027 neh ai geh 12 mpồl broă, 8 rơndăp broă, broă lơh tờm mờ lơh ngan lơh nùs nhơm kơ̆p kờñ gơs ală broă lơh geh cồng nha mùl màl. Pal kah ngan là ală jơnau kờñ geh broă bè: pah nam tam pa 250 rơbô tờm chi; dong kờl 10 ƀòn gơtìp kal ke lơh gơs khà broă ƀòn lơgar pa; dong kờl 200 tơmàn đong ai ơruh pơnu in càn mŭt lơh broă; pah nam tơmù geh rơlao 6% hìu rơƀah ơruh pơnu kòn cau...

Cau mblàng Ndong Brawl