Bơh dềt tus dờng kis tàm thôn Lại Đà, xã Đông Hội, kơnhoàl Đông Anh, ƀòn dờng Hà Nội-do là dùl ƀòn lơngăp lơngai mờ ală làng bol lơbơn niam, mơya geh bơhiàn bơsram jăk mờ là kòn pŭt tàm dùl hìu nhă sùm lơh broă lơh sa suơn sre, gal oh mi dê. Tổng Ƀí thư ồng Nguyễn Phú Trọng sùm geh bơyô bơsram bal kah tus mờ să bồ dềt, măt sàng krơi is, tàm hơ̆ gŏ uă ngan là lơbơn niam, gơlòng sồr mờ tơryăng ngan tàm broă bơsram sră. Tơnơ̆ do neh lơh bal mờ uă broă at gơnoar broă kwơ màng geh Đảng, Dà lơgar bal mờ Làng bol jào bè: Kwang geh jơng tàm Mpồl duh broă Đảng Dà lơgar bơh khoă VII tus khoă XIII; Kwang geh jơng tàm Ƀộ Cíñ trị bơh khoă VIII tus khoă XIII; Kwang atbồ dờng Sền swì jơnau cih Pang ƀăo Kộng sản; Củ tịc Mpồl duh broă Cribơyai jơnau tàm sră pơ àr Dà lơgar; Ƀí thư Thàñ ủy ƀòn dờng Hà Nội; Củ tịc Quốk hội; Củ tịc lơgar; Tổng Ƀí thư bơh khoă XI tus khoă XIII, ồng Nguyễn Phú Trọng neh geh uă tă pơgồp dờng ngan, kwơ màng ai broă kăc màng bơh Đảng mờ jơi bơtiàn he in.

Ồng Đào Duy Quát, Phó Kwang atbồ Ƀan Tuyên giáo Dà lơgar lài do đơs: “Tàm jơh ală gơnoar broă kwơ màng bơh să tờm dê, ồng Nguyễn Phú Trọng neh lơh broă mờ nùs nhơm rơcang lài, gùng dà broă lơh jăk chài, geh kơnòl uă mờ bồ tơngoh kơlôi sơnơng geh bơtơl bơh tàm mùl màl den tàng ồng neh lơh gơs jăk ngan kơnòl geh jào. Tàm hơ̆ uă ngan tàm gơnoar broă Tổng Ƀí thư lơh 03 tơngai tơn ồng neh tam klăc bal, ring bal bơh Ƀộ Cíñ trị, Ƀan Ƀí thư, Mpồl duh broă Đảng Dà lơgar lơh geh jơnau ring bal tàm gùt Đảng dê”.

Rài kis ờ pơnhừ să, đềt mềr mờ ală tiah geh ai tơngŏ tơn tàm broă lơh ha là tàm rài kis bơh să tờm ồng dê. Mờ Đảng viên Phùng Huy Đan, ồng gŏ kòn bơnus Tổng Ƀí thư là cau lơh krơh lài bè nùs nhơm kăc màng sùm pơn dềt să, ờ pơnhừ, đềt mềr mờ làng bol mờ ală cau. Bơta niam bơnĕ hơ̆ ồng geh gŏ tŭ tus bal 04 dơ̆ tìp mờ cau tĕ khà bơh Mpồl cau ala măt Quốk hội mpồl tĕ khà sồ 01 ƀòn dờng Hà Nội dê, do là mpồl Tổng Ƀí thư ồng Nguyễn Phú Trọng là Cau ala măt Quốk hội mờ tus tŭ do, bơta niam bơnĕ hơ̆ ồng kung gam kah sùm, cau tĕ khà Phùng Huy Đan đơs: “Añ pơnyờ să ngan geh tìp wa Trọng tàm 04 dơ̆ tìp mờ cau tĕ khà, wa lòt tìp mờ cau tĕ khà mờ làng bol den tàng đềt mềr ngan, tŭ cau tĕ khà đơs wa iăt nền nòn, cih tàm pang sră. Tơnơ̆ mờ tŭ jơnau đơs neh jơh, tàm jơnau đơs pơn dŭt den wa kung đơs là jơh ală wa là ală cau wă ngan, kơlôi sơnơng nền nòn bè gùng dà broă lơh. Den tàng ală wa neh geh ală jơnau pơgồp bal geh kwơ màng ngan ai Quốk hội in, jơnau đơs bơh ală ồng di pal ngan, geh đơs di tàm bơta kờñ, tŭ ơm rơlô den wa lik at tê mờ ală cau. Jơh ală cau, cau lơi kung kờñ tus bal den tàng tơrgùm bal nàng kŭp rùp mờ wa”.

Là cau đơng lam dờng ngan rơlao jơh bơh Đảng dê, Tổng Ƀí thư ồng Nguyễn Phú Trọng sền gròi uă bơta, uă gah broă lơh mờ uă bơta broă bơh khoa họk, bơto bơtê mờ bơsram tus mờ bơta niam chài, đơs crih tamya, sră ƀăo, bơh broă tơn jơh jơgloh tơmù rơƀah tus mờ broă bơto bơhiàn ờs mờng kờñ gơboh mờ dà lơgar mờ kăc màng ai ală rơnàng in…, tus tàm ală tiah lơi kung gŏ bơh să bồ ồng geh bơta jơh nùs nhơm mờ geh kơnòl uă ngan. Tus mờ ƀòn dờng Hồ Chí Minh “gơklŏ gơcrà măt biàng” mờ làng bol đah jum dà lơgar “geh uă bơta kờñ gơboh”, Tổng Ƀí thư kơ̆p kờñ ƀòn dờng Hồ Chí Minh mùl màl là ƀòn dờng nùs nhơm niam, dong kờl bal, gơguh jăk; làng bol geh rài kis hờm ram, gơboh gơbài, kờñ geh bè hơ̆ Ƀòn dờng pal pơn jăt tai bơcri priă tam gơl pa, tơnguh uă tơl ală bơta, bơta niam bơto mờ bơsram, bơtàu tơnguh cau lơh broă, tàm hơ̆ uă ngan là cau lơh broă geh bơta jăk uă, cau lơh broă đơng lam, atbồ; bơtàu tơnguh pràn bơta chài măi mok pa pơgồp bal mờ bơtàu tơnguh lơh sa ngăc ngar, lơh tờm broă lơh pràn ƀòn dờng bơtàu tơngu mhar mờ kơl jăp.

Gam gơwèt mờ Đảng ƀộ, làng bol ală jơi bơtiàn càr tiah nhàr dà lơgar càr Lạng Sơn, Tổng Ƀí thư kung nting bơto, mờ kơnòl broă là “tiah căng gàr dà lơgar dê” bè sền gàr dà lơgar, lơngăp lơngai, mờ kung là “tiah căng bè lơh sa”, sền gàr kơl jăp drà kă bro tàm dơlam lơgar kung là sền gàr gơnoar tờm, lơngăp lơngai lơh sa dà lơgar dê; rơcang lài lơh geh cồng nha broă lơh lơh broă mờ lơgar ndai mờ mŭt gơrờm bal mờ ală lơgar, bơ̆t bơtàu tiah nhàr dà lơgar ring lơngai, lơh bơyô, ai geh tiah ƀuơn nàng bơtàu tơnguh lơh sa mpồl bơtiàn càr, bơh tiah tàm gùl, kơh bơnơm đah tô dà lơgar mờ gùt lơgar dê.

Mờ càr lơgar Hà Nội, ờ mìng là nùs nhơm mờ ù tiah neh deh mờ dờng mờ gam là kơnòl dờng màng ngan gơwèt mờ Càr lơgar - plai nùs gùt lơgar dê, Tổng Ƀí thư ồng Nguyễn Phú Trọng sùm ai broă sền gròi is ồn ngan mờ geh ală jơnau đơng lam nền nòn, geh  kwơ màng gơwèt mờ broă bơtàu tơnguh tềng đăp măt mờ jŏ jòng. Tổng Ƀí thư ồng Nguyễn Phú Trọng ngoh rơngăc đơs: “Đơs tus Càr lơgar Hà Nội, tàm nùs nhơm bơh tơl nă kòn bơnus lơgar Việt Nam dê ndrờm ngoh rơngăc, pơnyờ să bè ù tiah rơbô nam niam chài mờ Khin cha, niam tàm jơnau đơs mờ àng niam, Càr lơgar bơh nùs nhơm niam, bơta niam kòn bơnus, ƀòn dờng tài bơta ring lơngai, hơ̆ sồng “bŭ lah geh lòt tus tàm ală tiah, nùs nhơm kung gam kah Hà Nội sùm”. Mờ mùl màl bè hơ̆, tàm jơh rài kis lơh broă “tài dà lơgar, tài làng bol” Chủ tịc Hồ Chí Minh sùm ai Càr lơgar Hà Nội là ală nùs nhơm niam is ồn. Hà Nội kung là anih pơgồp bal mờ bơta kwơ màng tàm rài kis lơh broă kăc màng bơh Wa Hồ dê, dùl tàm ală anih Củ tịc Hồ Chí Minh kis mờ lơh broă jŏ ngan, anih geh uă ù tiah tềl jơng Wa, tŭ đơs bè Hà Nội, Wa mờng ai geh pe akhar “Càr lơgar he”. Tàm ngai sơnrờp Càr lơgar geh tơnklàs (10-10-1954), Wa cih: “Gùt lơgar sền tus Càr lơgar he, dunia kơ̆p gơn tàm Càr lơgar he, jơh ală he pal lơh ngan ai jơh pràn sền gàr rơndăp tăp sèng, lơngăp lơngai, lơh nàng Càr lơgar he Gơs dùl Càr lơgar ring lơngai, niam bơnĕ, pràn kơl dang jơh bè phan bơna mờ nùs nhơm, do là broă sền gròi is ồn ngan mờ kung là jơnau sồr, jơnau kơ̆p kờñ, pin dờn nàng Hà Nội mùl màl bơtàu tơnguh, lam lài, lơh krơh ai gùt lơgar in bè Wa Hồ neh geh tŭ nting bơto mờ Càr lơgar he dê”.

Bơh ală dơ̆ lòt tus mờ kwang bàng, làng bol mờ sền tàm mùl màl, ală bồ tơngoh kơlôi sơnơng pa, di mờ mùl màl geh Tổng Ƀí thư ồng Nguyễn Phú Trọng đơs mờ Đảng, Dà lơgar tàm gùng dà broă lơh jăt ală gùng dà broă lơh nàng kơ̆ kơl jăp mhar broă lơh sa mpồl bơtiàn mờ bơtàu tơnguh dà lơgar, bơ̆t bơtàu củ nghĩa xã hội. Mờ ală broă lơh mùl màl, Tổng Ƀí thư ồng Nguyễn Phú Trọng neh lơh àng sơrdah rùp rài dùl nă cau đơng lam jơh nùs, di mờ mùl màl, khin kơlôi, khin lơh, khin dờp kơnòl tềng đăp Đảng, tềng đăp làng bol, den tàng neh geh làng bol pin dờn mờ gơboh kờn..

Plai nùs bơh Cau kộng sản song niam Tổng Ƀí thư ồng Nguyễn Phú Trọng neh ờ tàp tă tai, mơya gùt Đảng, gùt làng bol mờ gùt ling klàng he kung gam kah sùm rùp rài dùl bơta ngăc ngar dờng bơh kăc màng lơgar Việt Nam, bơh cau kơlôi sơnơng, cau niam chài, cau lam lài jơnau cribơyai tàm sră pơ àr bơh Đảng, kis jơh rài kis tài dà lơgar, tài làng bol, tài bơta kơ̆p kờñ niam bơnĕ ngan.