- Ơ ồng, Ngai cau dờng sơnam ală lơgar nam do (1/10) kung là dơ̆ lam lơh nhai lơh broă tài cau dờng sơnam. Den dan ồng pà gĭt, jơnau kờñ, bơta kwơ kung bè ală broă lơh tờm tàm nhai lơh broă do dê?

Ồng Nguyễn Thanh Bình: Nam do, bol añ bơyai lơh dơ̆ lam lơh jơh gùt lơgar tàm càr Hải Dương. Lam lơh nhai lơh broă mơya pơn jat tai pơndờm pơnđiang cau dờng sơnam sơm bat tê bal, tă pơgồp ngan ngồn lơh jat dơ̆ hòi jà lơh geh cồng nha uă ngan rlau jơh.

Tàm tŭ lam lơh jat, bol añ bơyai lơh mblàng yal jrô ơnàng làm uă bè jơnau kờñ, bơta kwơ, tơngume bơh nhai lơh broă bè cau dờng sơnam Việt Nam nam 2024 dê. Bơh hơ̆, lơh geh nùs nhơm lơh jat jơh nùs, geh bơta tus bal sồr lơh tơn bơh kấp ủy, gơnoar atbồ, mặt trận ală kấp, bơh hơ̆ kung geh bơta pơgồp bal niam ngan mờ ală mpồl cau, mpồl lơh broă uă rlau tai, nàng lam lơh nhai lơh broă in lơh geh cồng nha uă ngan rlau jơh, lơh gơrề làm uă rlau tai tàm ală kấp mpồl kung bè jơh gùt mpồl bơtiàn. Bơh hơ̆ nàng pơndờm pơnđiang, pơn jờng, dong kờl cau dờng sơnam gam kal ke tàm ală tiah tàm jơh gùt lơgar in.

-Tơngai pa do, Đảng, Dà lơgar sùm ai bơta sền gròi is ồn ngan gơwèt mờ cau dờng sơnam, bơh hơ̆ geh tơngŏ loh làng bơh broă Ƀan Ƀí thư neh ai lơh jat Jơnau đơs pơndŭt sồ 58 bè broă lơh bơh cau dờng sơnam dê. Do geh sền là tềl lời wơl kwơ màng tàm broă bơyai lơh, tam gơl broă lơh lơh broă bơh mpồl cau dờng sơnam dê, nàng cau dờng sơnam in lơh jat niam rlau tai mờng chài bồ tơngoh tàm broă lơh bal bơh Dà lơgar dê. Den, dan ồng pà gĭt loh rlau tai bè tơngume do?

Ồng Nguyễn Thanh Bình: Bè hơ̆, tŭ geh Jơnau lơh nền sồ 58, geh bơta sền gròi bơh gơnoar atbồ ală kấp, bol añ neh lơh sồr lơh, pơgồp bal niam mờ ală anih lơh broă Dà lơgar lam lơh dồ ròt bal, gàr niam bơta ring bal tơrgùm bal ală gah bơh broă lơh mpồl dê bơh Dà lơgar tus ƀòn lơgar. Broă lơh lam lơh lơh tus broă lơi kơ̆ broă hơ̆ nàng tam gơl broă lơh tàm 5 càr, ƀòn dờng tài bơh tŭ do 50 càr, ƀòn dờng gam lơh broă jat broă lơh kấp càr, kấp kơnhoàl là mpồl ala mat. Den tàng bè hơ̆ tŭ lơh broă bơh mpồl dê gơ gơs 4 kấp tờm loh làng den ală bơta, cồng nha lơh broă bơh mpồl dê geh bơtàu tơnguh. Lơh niam broă lơh sền gàr, dong kờl mờ lơh jat geh gơnoar bơh cau dờng sơnam dê, nàng cau dờng sơnam in pơn jat tai tus bal, tă pơgồp bal bơta pràn, bồ tơngoh tàm bơta bơtàu tơnguh bơh Dà lơgar dê.

- Ơ ồng, geh gĭt, tàm mìu càl rơbŭt dờng sồ 3 lơh aniai pa do bal mờ làng bol jơh gùt lơgar, Mpồl cau dờng sơnam Việt Nam kung geh ală tă pơgồp jơh nùs ngan nàng dong kờl, tam pà bal mờ làng bol tiah gơtìp trồ tiah lơh aniai, is ồn là gơwèt mờ cau dờng sơnam, geh rài kis kal ke, roh rui bè phan bơna, hìu đam. Den dan ồng pà gĭt loh làng rlau tai bè bơta tàm sơm bat tê bal bơh cau dờng sơnam dê tàm broă lơh geh kwơ ngan do?

Ồng Nguyễn Thanh Bình: Lơh jat jơnau đơs sồr lơh bơh Tổng Ƀí thư, Củ tịc lơgar ồng Tô Lâm dê; lơh jat jơnau hòi jà bơh Anih duh broă Mặt trận Dà lơgar Việt Nam, hòi jà bơta tàm sơm bat tê bal dong kờl làng bol ală càr gơtìp aniai bơh mìu càl rơbŭt sờng sồ 3 dê lơh aniai, bol añ neh di tŭ ai lơh jat sră nggal mờ lam lơh sồr lơh tus ală kấp mpồl bơh Dà lơgar tus ală thôn, ƀòn. Tơl nă cau dờng sơnam tơnguh uă gơnoar tă pơgồp jài mơkung hòi jà tai oh kòn kòn sau, hòi jà ală cau tàm mpồl cau dờng sơnam jơh gùt lơgar dê tă pơgồp bal, dong kờl bal, dong kờl làng bol ală càr gơtìp mìu càl rơbŭt dờng sồ 3 dê lơh aniai lơh gơbàn uă ngan hoàc huơr.

- Ơi, dan ưn ngài ồng uă ngan!