Ntào tềng gah wàng ròng be geh rơlao 20 nơm be, ồng Quách Thiện, kis tàm thôn Dăk Rmo, xã Dăk Ndrung, kơnhoàl Dăk Song, càr Dăk Nông chờ hờp pà git, ròng be neh dong kờl hìu nhă ồng geh tai priă uă ngan. Hìu nhă ồng ntrờn tus tàm do ơm kis bơh nam 2006, mơya tài gal kòn mờ ờ geh ù lơh sa den tàng kung gam sùm khà mpồl hìu rơƀah. Bồ nam 2020, gŏ rài kis hìu nhă ồng gơtìp kal ke, ală cau geh đảng tàm ƀòn mờ xã neh dong kờl ai hìu nhă ồng ròng 4 nơm be, mờ dong kờl ồng lơh wàng, bơto sồr tàm broă ròng, rơcang sơndră mờ kòp nàng geh priă. Mpồl be deh kòn mhar ngan, tàm nam sơnrờp neh cèng hìu nhă ồng in geh 10 tơlăk đong mờ nam do là mờr 50 tơlăk đong.

Bal mờ hơ̆, ală cau geh đảng tàm xã, kơnhoàl kung neh dong kờl nàng ồng Thiện mŭt lơh kông ñân tàm kông ty lơh sa suơn sre tàm xã. Kơnờm mờ hơ̆, rài kis hìu nhă ồng neh rơhời kơl jăp, mờr klàs rơƀah: “Be den kung sa nha chi, sa lơ̆ mờ ñhơ̆t mơ. Mpồl be dờng mhar ngan, ală kòn dờng den kung deh hơ̆ sồng lời ròng. Kung ưn ngài ală kấp, gơnoar atbồ neh dong kờl, dong kờl hìu nhă ờ hoan kal ke rơlao”.

Dong kờl hìu nhă ồng Quách Thiện là mpồl 5 nă cau geh đảng, tàm hơ̆ geh bal cau tàm ci ƀộ ƀòn, tàm đảng ủy xã mờ huyện ủy. Ồng Lương Quốc Lam, Ƀí thư ci ƀộ thôn Dăk Rmo pà git, bal mờ hìu nhă ồng Quách Thiện, neh geh tai 4 hìu rơƀah tàm ƀòn geh dong kờl bơh broă lơh “5 nă cau geh Đảng dong kờl 1 hìu klàs mờ rơƀah” mờ 3 tàm khà do neh klàs mờ rơƀah. Să tờm ồng Lam kung tus bal dong kờl hìu ồng Quách Thiện sơl mờ gŏ là, mờ broă kơlôi sơnơng nền nòn rài kis, bơta geh kung bè broă kờñ, jơnau kơ̆p kờñ bơh hìu rơƀah dê, ală broă dong kờl là geh mùl màl, lơh geh cồng nha: “Hìu rơƀah den mìng là ờ geh broă lơh, priă lơh sa mờ phan lơh broă. Tàm ală nam do. Ci ƀộ bal mờ ală gah, mpồl lơh broă kung neh lơh niam gùng dà broă lơh “5 nă cau geh đảng dong kờl 1 hìu klàs rơƀah”, gŏ geh cồng nha niam ngan. Geh dong kờl, ai geh broă lơh den tàng làng bol klàs mờ rơƀah kơl jăp”.

Mò Vương Thị Hiền, Phó Củ tịc Uỷ ƀan Mặt trận dà lơgar Việt Nam xã Dăk Ndrung, kơnhoàl Dăk Song, càr Dăk Nông pà git, tơnơ̆ mờ rơlao 2 nam lơh, broă lơh “5 nă cau geh Đảng dong kờl 1 hìu klàs rơƀah” geh cồng nha tàm xã. Tŭ do gùt xã gam geh 52 hìu rơƀah geh ală cau geh đảng dong kờl. Mờ broă tus bal bơh ală cau geh đảng tàm uă kấp, bơh ƀòn tus xã, kơnhoàl, bal mờ broă tus bal bơh ală mpồl lơh sa kă bro, cau geh nùs nhơm niam, den tàng priă ai tơl hìu rơƀah in geh tơrgùm ngan. Ală cau geh đảng ờ mìng dong kờl bè sơntìl phan tam, phan ròng, broă tam phan mờ ròng phan mờ gam tus bal dong kờl jòi drà tăc phan tŭ hìu rơƀah lơh geh phan. Ală hìu rơƀah geh bơto bơtê, mờ geh bơta pràn bè phan bơna, mờ geh bơta pràn bè nùs nhơm tai, den tàng geh tơl pràn nàng brồ guh klàs mờ rơƀah. Xã kung ai broă dong kờl pal geh mùl màl, dong kờl hìu rơƀah klàs mờ rơƀah kơl jăp, den tàng ờ lơh jăt bơta geh uă, mìng tơrgùm tàm bơta niam: “Mùl màl rài kis bơh làng bol gam uă ngan kal ke, làng bol gam ờ tơl bè uă bơta ngan den tàng broă mờng chài là ờ lơh jăt bơta uă mờ mìng tơrgùm tàm bơta niam. Tài dùl hìu rơƀah den he pal dong kờl uă bơta ngan, ờ gŏ di pal mìng dong kờl priă là làng bol geh klàs rơƀah. Nàng pleh mờ broă gơtìp rơƀah tai den xã ai neh dong kờl den pal dong kờl jơh, dong kờl uă bơta nàng làng bol mùl màl klàs mờ rơƀah”.

Mờ broă tus bal bơh ală kấp, ală gah lơh broă, tàm hơ̆ uă ngan là broă tus bal bơh ală cau geh đảng bơh broă lơh “5 nă cau geh đảng dong kờl 1 hìu klàs rơƀah”, uă hìu rơƀah tàm xã Dăk Ndrung đơs is, kơnhoàl Dăk Song đơs bal neh lơh ngan brồ guh, rài kis rơhời kơl jăp. Bơta do kung pà gŏ, kơnhoàl Dăk Song neh ai di broă lơh mờ lơh di gùng dà tŭ bơsram mờ lơh jăt ơnà jăk, nus nhơm, broă lơh bơh Wa Hồ dê tàm broă tơn jơh jơgloh, tơmù rơƀah.