Tàm gùl ƀlàng geh tờm chi mƀur niam tàm pôs ling sền gàr dà lơgar Srepok, tàm xã Krông Na, kơnhoàl Buôn Đôn, càr Dăk Lăk, rùp Wa Hồ mờ cau ling sền gàr tiah nhàr dà lơgar geh lơh niam bơnĕ mờ đềt mềr ngan. Đại uý Phạm Văn Thức, Cíñ trị viên phó Pôs ling sền gàr tiah nhàr dà lơgar Srepok pà git, tơnơ̆ 2 nhai lơh, broă lơh do geh ai ngui di tàm dơ̆ tơnkah 134 nam ngai deh ƀồc Củ tịc Hồ Chí Minh sơlơ geh kwơ rơlao. Đại uý Phạm Văn Thức pà git: “Tŭ geh broă lơh tàm mpồl lơh broă, geh ală gùng dà broă lơh niam chài mpồl ling dê geh tai dùl broă lơh kwơ màng ngan, geh kwơ màng uă ngan, ờ mìng bè đah bơta niam chài mờ gam geh bơto bơtê bơhiàn ờs mờng uă ngan ai ală rơnàng kwang bàng, cau ling tàm Pôs ling sền gàr tiah nhàr dà lơgar Srepok in, dùl bơta tơngŏ kwơ màng neh ai gŏ bơta gơjăt bal mờ pơn jăt tai ngui bơhiàn ờs mờng khin cha jăk chài bơh mpồl ling sền gàr tiah nhàr dà lơgar dê”.

Bơh nam 2019 tus tŭ do, cau kơnòm să càr Dăk Lăk neh lam sồr tă geh uă priă, pơgồp bal mờ ală mpồl lơh broă nàng lơh 4 broă lơh rùp Wa Hồ mờ cau ling sền gàr tiah nhàr dà lơgar, geh ơn tàm ƀlàng ală pôs ling sền gàr tiah nhàr dà lơgar tàm càr dê. Tềng jơng rùp geh cih 4 jơnau nrĭ bơh Wa Hồ cih gơs kờñ pà ală kwang bàng, cau ling sền gàr tiah nhàr dà lơgar bè do: “Dà lơgar tơlir niam geh sùm/Sền gàr Dà lơgar he ờ ngòt glar bòl/Bơnơm ñhoa broă lơh sơlơ ñhoa/Dà lềng jrô nùs nhơm he pơn drờm bal sơlơ jrô”.

Wă jơnau bơto bơh Wa Hồ dê, ală rơnàng kwang bàng cau ling sền gàr tiah nhàr dà lơgar tàm càr Dăk Lăk sùm lơh ngan sơrlèt mờ ală kal ke nàng lơh gơs niam kơnòl broă geh jào. Thượng úy Y Sơn Niê Êban, lơh broă tàm Pôs ling sền gàr dà lơgar Yok Đôn, xã Krông Na, kơnhoàl Buôn Đôn pà git: “Wa Hồ là cau crơng gơs mpồl Ling sền gàr tiah nhàr dà lơgar, lài mờ hơ̆ là mpồl ling phào crong làng bol dê. Wa kung neh tus còp mờ crơng gơs Họk viện Biên phòng. Bơta do geh kwơ màng ngan, nting bơto kwang bàng, cau ling kung bè đoàn viên sùm pal bơsram mờ đờm jăt nùs nhơm, ơnà jăk, broă lơh bơh Hồ Chí Minh dê”.

Jăt Đại uý Nguyễn Bá Giáp, kwang pơlam broă bơsram tàp cơl dŭ lơh broă cíñ trị, Cau ling sền gàr tiah nhàr dà lơgar càr Dăk Lăk yal, rùp rài Wa Hồ đềt mềr jào kơnăc ù ai cau ling in sùm là jơnau nting bơto mờ ală cau ling sền gàr tiah nhàr dà lơgar dê pal sền kwơ sùm tus tơl nđàm ù nhàr dà lơgar. Đại úy Nguyễn Bá Giáp pà git: “Do kung là dùl tàm ală ñjrong kung bè là bơta ai tơngŏ gơnoar tờm ù tiah dà lơgar he dê tàm tơl nđàm ù mờ nting bơto ală rơnàng kwang bàng, cau ling sền gàr tiah nhàr dà lơgar sùm lơh gơs jăk chài kơnòl broă geh jào, kơ̆ tê at ngkơr phào dền gàr tơl nđàm ù Dà lơgar dê”.

Broă lơh rùp Wa Hồ mờ cau ling sền gàr tiah nhàr dà lơgar tàm ală pôs ling sền gàr tiah nhàr dà lơgar là cồng nha bơh broă tus bal bơh đoàn viên ơruh pơnu tàm càr Dăk Lăk dê. Lŏ H’ Giang Niê, Ƀí thư Tỉñ đoàn càr Dăk Lăk pà git, do kung là broă lơh nàng pơgồp bal tàm broă bơto bơtê bơhiàn ờs mờng rơnàng kơnòm să in. “Bol añ lơh rùp Wa Hồ mờ cau ling sền gàr tiah nhàr dà lơgar là nàng ală bơyô đoàn viên, ơruh pơnu tŭ tus tàm tiah nhàr dà lơgar geh dơ̆ nàng yal bè tiah nhàr dà lơgar, yal bè nùs nhơm, ơnà jăk, broă lơh bơh Hồ Chí Minh dê, đơs bè cau ling sền gàr tiah nhàr dà lơgar mờ do kung là bơta tờm nàng lam sồr dờng màng ngan gơwèt mờ kwang bàng, cau ling tàm tiah nhàr dà lơgar dê”.

Rùp “Wa Hồ mờ cau ling Sền gàr tiah nhàr dà lơgar” neh gơs phan bơna nùs nhơm bơh mpồl lơh broă, geh bơta kwơ niam chài dờng màng ngan, ai tơngŏ loh làng ngan rùp rài Wa Hồ mờ cau ling sền gàr Tiah nhàr dà lơgar dê, tơlik broă sền gròi dờng màng bơh Đảng, Wa Hồ gơwèt mờ broă sền gàr gơnoar tờm ù tiah, bơta lơngăp lơngai tiah nhàr dà lơgar bal mờ kwang bàng, cau ling sền gàr Tiah nhàr dà lơgar dê. Rùp “Wa Hồ mờ cau ling sền gàr tiah nhàr dà lơgar” tiah nhàr dà lơgar càr Dăk Lăk neh gơs phan bơna nùs nhơm, dong kờl tơl nă kwang bàng cau ling tus bal bơsram rơlao tai mờ đờm jăt nùs nhơm, ơnà jăk, broă lơh bơh Hồ Chí Minh dê, ngui bơhiàn ờs mờng jăk chài rơnàng ồng pàng lài do dê nàng sền gàr, bơ̆t bơtàu mờ bơtàu tơnguh ƀòn lơgar.