VOV4.K’ho - Drim òr (15/09), tàm Hà Nội, geh bơyai lơh Pơrjum khoa họk mờ tơngu me “Cau kơnòm să lơgar Việt Nam mờ lơgar Lào bơsram mờ lơh jăt nùs nhơm, ơnà jăk Củ tịc Hồ Chí Minh mờ Củ tịc Cay-Sỏn Phôm-Vi Hản”, geh Đoàn ơruh pơnu Kộng sản Hồ Chí Minh pơgồp bal mờ Ƀan Tuyên giáo Dà lơgar bơyai lơh.

Cau kơnòm să lơgar Việt Nam mờ lơgar Lào bơsram mờ lơh jăt nùs nhơm, ơnà jăk bơh Củ tịc Hồ Chí Minh mờ Củ tịc Cay-Sỏn Phôm-Vi Hản

Do là broă lơh mùl màl tơnkah 60 nam ngai crơng gơs broă lơh bal mờ lơgar ndai đah lơgar Việt Nam mờ lơgar Lào mờ 45 nam ngai kĭ Hiệp ướk lơh bơyô mờ lơh broă bal đah bàr lơgar Việt Nam mờ Lào. Ală jơnau đơs tàm pơrjum ndrờm ai tơngŏ nùs nhơm bơh Củ tịc Hồ Chí Minh mờ Củ tịc Cay-Sỏn Phôm-Vi Hản là phan bơna kwơ màng bơh bàr Đảng, bàr dà lơgar là tơngu me tờm nùs nhơm, gùng dà ai broă lơh bơh Đảng mờ kăc màng bàr lơgar, tàm hơ̆ geh cau kơnòm să lơgar Việt Nam mờ lơgar Lào. Kơnòl cíñ trị bơh rơnàng kơnòm să bàr lơgar Việt Nam mờ Lào mờ pơn jăt tai bơsram, git wă nền nòn mờ lơh jăt nùs nhơm bơh Củ tịc Hồ Chí Minh bal mờ nùs nhơm bơh Củ tịc Cay-Sỏn Phôm-Vi Hản dê. Ală kwang bàng kung đơs tờm: Rơnàng kơnòm să bàr lơgar Việt Nam mờ Lào là rơnàng pơn jăt tai broă kăc màng, tơnguh bơtàu mờ bơ̆t bơtàu broă lơh bơyô mờ tam klăc bal kwơ màng đah lơgar Việt Nam mờ lơgar Lào.

Cau mblàng Ndong Brawl