VOV4.K’ho- Sơrlèt gan ală kal ke bơh kòp Kovid-19 dê, ală đoàn viên, ơruh pơnu tàm gùt lơgar neh lam lơh uă broă lơh bơceh pa, dong kờl làng bol bơtờp kòp Kovid-19 mờ mpồl lam lài sơndră kòp. Bơta do ai tơnggŏ bơta gơ dờp, ngac ngar bơh cau kơnòm să dê tàm tơl broă gơlik geh mờ lời wơl ală tềl niam ngan.

Nhai 5 nam 2021, mpồl ơruh pơnu lơh broă dong kờl is ală càr tiah đah tô dà lơgar neh lam lơh uă broă lơh tă pơgồp, dong kờl phan sa, chèu glòm muh mat, dà lơh kloh khuẩn tus ală càr Hà Nam, Vĩnh Phúc, ƀòn dờng Hà Nội. Tàm hơ̆, sơ gơn dră wơl dà mprañ geh ală đoàn viên bơceh mòn, lam lơh neh cèng wơl cồng nha niam ngan tàm broă tơrmù jơnau pơhìn bơtờp kòp. Mìng tàm 3 ngai lơh broă, Đinh Thị Ngọc Thảo bal mờ ală cau tàm mpồl lơh broă dong kờl is Hìu ơm bal Pháp Vân, ƀòn dờng Hà Nội neh mòn gơs 1 rbô nơm sơ gơn dră wơl dà mprañ nàng pơyua tus tiah tờm gơbàn kòp: “Soh tàm să àu tơlir lơh broă dong kờl is, mpồl bol hi chờ hờp ngan tŭ geh Mpồl lơh broă dà lơgar mờ mpồl lơh broă dong kờl is jàu kơnòl lơh sơ gơn dră wơl dà mprañ, mờ bơta kơp kờñ gơtùi tă pơgồp dùl êt bơta pràn tus bal tàm broă rơcang sơndră kòp”.

Tàm tơngai kòp Kovid-19 gơlik geh kal ke, cau kơnòm să gùt lơgar gam lơh uă phan bơna bơceh pa ndai nàng dong làng bol bơtờp kòp Kovid-19 mờ kwang bàng mpồl lam lài sơndră kòp. Hơ̆ là ală jơ nờng mờ sră Catong drơng ală anih tam cah is tơrgùm bal in; ală anih ai mẫu xét nghiệm geh măi mrềt lời ai mpồl lơh sơnơm ai mẫu xét nghiệm in tàm ală ngai tơngai duh... Ală phan bơna bơceh pa geh kuơ ngan ngồn dong mpồl lam lài sơndră kòp in.

Tŭ khà cau F0 tàm Hà Nội gơguh uă tàm bồ nam 2022, Đoàn ơruh pơnu, Mpồl tam klac ơruh pơnu ƀòn dờng Hà Nội neh lam lơh broă lơh ATM oxy, cèng oxy tus dong kờl làng bol F0 sơm kòp tàm hìu. Bi Nguyễn Thị Phương Dung, Ƀí thư quận Đoàn Tây Hồ pà git, broă lơh ATM oxy ờ mìng dong làng bol iang nùs sơm kòp tàm hìu mờ gam dong tơrmù ƀà bơta kơn jơ̆ ai gah lơh sơnơm in: “Đoàn ơruh pơnu tàm ƀòn làng bol ơm kis lam lơh uă kơnòl broă dong kờl rơcang sơndră kòp bơh ƀòn lơgar dê. Ơruh pơnu tus bal ală mpồl dong kờl F0, pơndiang oxy tus tàm hìu, tàm tơrbŏ bal mờ mpồl cau lơh sơnơm kơnòm să, Tổng đài 1022 dong kờl cau kòp sơm tàm hìu. Bơdìh hơ̆ tai gam crơng gơs uă mpồl ơruh pơnu dong kờl cit sơnơm vaccine, pơndiang ală phan ngui sa pal geh ai cau kòp sơm tàm hìu in”.

Ờ mìng bơceh pa tàm ală broă lơh dong kờl cau F0 mờ mpồl lam lài sơndră kòp, tàm rlau 2 nam do, git nđờ rbô nă ơruh pơnu là y ƀák sĩ kơnòm să, cau bơsram dờng gah lơh sơnơm, ală cau ling soh àu blue kò neh lòt gùng tus mpồl lài sơndră kòp. Rlau 2 nhai mut tàm ƀòn dờng Hồ Chí Minh bal mờ cau kòp tam dră mờ kòp Kovid-19, Thạk sĩ- Ƀák sĩ Đỗ Doãn Bách, Viện Tim mạc, hìu sơnơm Bạch Mai git ală bơta kơp kờñ bơh cau kòp F0 sơm tàm hìu dê, tŭ gah lơh sơnơm gal ir cau kòp. Ƀák sĩ Đỗ Doãn Bách bal mờ cau lơh broă bal crơng gơs mờ ai lơh broă Mpồl cau lơh sơnơm lòt bal tus bal, pơlam ai 150 rbô nă cau F0 sơn kòp tàm hìu in: “Tàm tơngai mut tàm tiah đah jum dà lơgar sơndră kòp, añ kơp kờñ geh tă pơgồp, kơp kờñ geh dong kờl tơl nă cau, Tơngai hơ̆ mpồl lòt bal geh crơng gơs, añ dờp geh uă dơ̆ hìu điện thoại bơh làng bol dê, kơp kờñ he gơtùi pơn dờm pơnđiang làng bol, pơlam khi sơm kòp. Tàm mpồl cau lơh sơnơm lòt bal, añ kung at knòl broă ai ngui, rơ wah mờ bơto bơtê ai mpồl cau lơh sơnơm in pơlam, dong kờl cau kòp sơm kòp tàm hìu. Tŭ do mpồl geh mờr 120 rbô nă cau là cau lơh sơnơm”.

Ờ mìng bơceh pa nàng gơ dờp tàm tơngai kòp dờng, nam 2021, cau kơnòm să Việt Nam neh ai tơlik 2 tơlak 200 rbô jơnau bơceh pa bơh ală broă lơh, tàm hơ̆ rlau 74 rbô jơnau bơceh pa geh mpồl duh broă Đoàn ală kâp dong kờl, lam lơh ngan ngồn. Jat bi Ngô Văn Cương, Ƀí thư Đoàn Ơruh pơnu Kộng sản Hồ Chí Minh pà git, Mpồl duh broă Đoàn sùm lơh gơlik ală anih nhơl, ală broă lơh nàng ală cau kơnòm să in geh tŭ niam tơnguh bơta bơceh pa mờ dong kờl lam lơh ngan ngồn jơnau bơceh pa hơ̆: “Đoàn dà lơgar geh anih yal tơnggit tàm điện tử tơrgùm jơh ală jơnau bơceh pa bơh ală cau kơnòm să tàm gùt lơgar dê. Tơnơ̆ hơ̆, bol hi jàu ală Tỉñ đoàn, Thàñ đoàn in kờp sền ală jơnau bơceh gơtùi lam lơh ngan ngồn nàng dong kờl, lơh gơlik bơta pràn hơ̆ sồng ală kơ cế, broă lơh dong ală cau kơnòm să in gơtùi lam lơh ngan ngồn ală jơnau bơceh hơ̆.”

Mờ bơta dong kờl bơh mpồl duh broă Đoàn dê, tàm tơl gah, cau kơnòm să Việt Nam geh sùm tơnguh bơta pràn bơceh pa, bơta kơp kờñ tă pơgồp bơta pràn cau kơnòm să dê nàng bơtàu tơnguh dà lơgar.

Cau mblàng K’Duẩn