Pa lamn mpồl cau năc lòt nhơl tus nhơl sền ală tiah lòt nhơl tàm Ƀuôn Trí B, xã Krông Na, kơnhoàl Buôn Đôn, lŏ Sáo Bun Trâm Adrơng pà git, nam do lŏ neh mờr 30 sơnam, mờ là kòn tàm hìu geh mè là cau lơgar Lào, bèp là cau Rơđê. Lŏ rơwah broă pơlam cau lòt nhơl tài lŏ kờñ geh lam cau lòt nhơl tus tàm ală gùng lòt tàm ƀòn, yal mờ ală cau năc in git bè rài kis, bơta niam chài mờ bơhiàn bơh làng bol gam kis tàm ù tiah kơnhoàl Buôn Đôn do: “Geh tàm să bàr dà mhàm cau Lào mờ cau Rơđê dê, añ neh rơwah broă pơlam cau lòt nhơl mờ kơ̆p kờñ geh yal bè bơta niam chài kòn cau dê tus mờ uă cau in nàng git rơlao. Tàm tơngai tus, añ kờñ yal ală cau in uă rơlao bè bơhiàn bơh bàr jơi bơtiàn kòn cau añ dê, tàm hơ̆ uă ngan là kòn cau Lào, geh uă ngan bơta lơh chờ, ờ mìng satềp Bunpimay mờ gam là lơh chờ nhai 6, nhai 12 pah nam tai”.

Tàm Buôn Đôn, jơnau cau Lào bao mờ cau Mnông, Rơđê geh uă ngan. Geh bơrlŭ bal bè bơta niam chài, dà đơs den tàng kal ke ngan kờñ đal git cau cau Lào ha là cau kis bơh yau tàm do. Bi Khăm Phon Lào, Kwang atbồ Cơl dŭ lơh sa suơn sre kơnhoàl Buôn Đôn, cau tàm Mpồl git gơ̆p lơh bơyô bal lơgar Việt Nam mờ lơgar Lào kơnhoàl Buôn Đôn pà git: “Tàm hìu tŭ do bao bal gơs 7 jơi bơtiàn kòn cau. Kòn cau Rơđê geh, kòn cau Jarai geh, kòn cau Hrê geh, cau Yoan geh den tàng tŭ rê kis bal den tàm bơrlŭ ndrờm bal. Bơh broă soh phan hơ̆ sồng jơnau đơs ndrờm geh ală broă tàm bơsram bal tàm bơta niam chài bơh tơl jơi bơtiàn kòn cau dê. Di lah kơlôi ngan bơh kơnòm dềt pa deh mờ dờng tàm ƀòn Ƀuôn Trí do ndrờm git bơh 2 tus 3 dà đơs, geh ală cau git đơs bơh 5 tus 6 dà đơs bơh ală jơi bơtiàn kòn cau dê”.

Ồng Bun Mi Lào, nam do mờr 70 sơnam, kis tàm ƀòn Ƀuôn Trí B, xã Krông Na, kơnhoàl Buôn Đôn yal, bŭ lah ală cau Lào rài sơnrờp ngan tus ơm kis tàm ù tiah kơnhoàl Buôn Đôn neh kra mờ chơ̆t, mơya ală rơnàng tơnơ̆ kòn cau Lào dê kis tàm xã tiah nhàr dà lơgar Krông Na kung gam pơn jăt tai, dờp, prăp gàr ală bơta kwơ niam ờs mờng bơh kòn cau Lào dê mờ kis gơrờm bal, tàm bơrlŭ bal bơta niam chài mờ ală jơi bơtiàn kòn cau kis bơh yau tàm do dê, den tàng nùs nhơm tam klăc bal ngai sơlơ kơ̆ kơl jăp. “Tàm do lơh sa kung ƀuơn, hơ̆ sồng oh mi tam klăc, dong kờl bal, geh bơta lơi gơtìp kal ke kung tus dong kờl bal, ù tiah niam den geh cau ơm kis. Cau Lào, cau Rơđê, cau Mnông, cau Yoan bè oh mi dùl hìu bal”.

Jăt ồng Phạm Trung Nghĩa, Củ tịc UɃÑZ kơnhoàl Buôn Đôn yal, kơnhoàl Buôn Đôn tŭ do geh 29 jơi bơtiàn kòn cau ơm kis bal mờ di pơgăp 70 rơbô nă làng bol, tàm hơ̆ cau lơgar Việt Nam geh jơi bơtiàn tờm bơh lơgar Lào geh di pơgăp 300 nă. Ală cau lơgar Việt Nam geh jơi bơtiàn tờm bơh lơgar Lào ơm kis tàm do sùm geh gơnoar atbồ kơnhoàl ai tơl bơta niam tàm ală gah broă nàng làng bol iang nùs bơsram sră, lơh broă mờ lơh sa bơtàu tơnguh lơh sa. Pah nam, tàm satềp bơhiàn bơh làng bol lơgar Lào dê, kơnhoàl ndrờm bơyai lơh niam bơnĕ ngan di mờ bơhiàn. “Cau lơgar Lào kis tàm ù tiah kơnhoàl geh 300 nă. Bơdìh mờ ală broă dong kờl bơh Đảng mờ Dà lơgar dê, den kơnhoàl kung geh ală broă sền gròi krơi is gơwèt mờ cau lơgar Lào kis tàm do, lơh bè lơi nàng rài kis lơh broă sa làng bol dê gơtùi bơtàu tơnguh tàm bă ù ơm kis bơh să tờm dê. Bol añ kung geh sền gròi ngan sơl tus mờ ală broă lơh lòt nhơl, tàm hơ̆ uă ngan là gơwèt mờ ală broă lòt nhơl niam chài krơi is bơh ală jơi bơtiàn kòn cau dê, den cau Lào kis tàm kơnhoàl Buôn Đôn kung là dùl tàm ală jơi bơtiàn geh bơta niam chài krơi kis, bol añ kung gam lơh ngan lơh geh ală bơta niam chài hơ̆ nàng lơh gơs ală bơta niam krơi is tàm broă bơtàu tơnguh lòt nhơl kơnhoàl dê”.

Ală cau lơgar Việt Nam geh jơi bơtiàn tờm bơh lơgar Lào gam kis gơrờm bal, tam klăc bal mờ ală jơi bơtiàn kòn cau ndai kis tàm bă ù kơnhoàl Buôn Đôn, lơh geh bơta tam klăc bal nền nòn tàm rài kis, bơta niam chài, pơgồp bal tàm broă gàr kơ̆ kơl jăp bơta lơngăp lơngai cíñ trị, lơh pràn broă bơtàu tơnguh lơh sa tàm kơnhoàl do dê.