VOV4.K’ho- Ngai 11/03/2022, Anih lơh broă sùm Anih Jơnau đơs Việt Nam tàm Tây Nguyên bal mờ gơnoar ătbồ tiah do mờ hìu bơnhă, cau pròc mhàm, gơ̆p bơyô, cau lơh broă bal neh lòt tơ̆p ƀồc Cau lơh ƀăo ồng Kpă Si Mon, lài do là Phó Kwang ătbồ Anih lơh broă sùm Anih Jơnau đơs Việt Nam tàm Tây Nguyên tus anih ơm rlô lồi dŭt tàm xã Chư Mố, kơnhoàl Ia Pa, càr Gia Lai.

Dơ̆ bơyai lơh ies ƀồc ồng Kpă Si Mon

Tàm tŭ 3 jiơ 20 phuk mho ngai 09/03/2022, Cau lơh ƀăo ồng Kpă Si Mon, lài do là Phó Kwang ătbồ Anih lơh broă sùm Anih Jơnau đơs Việt Nam tàm Tây Nguyên tài bơh kòp kơn jơ̆ ngan neh sang rài. Ồng deh ngai 03/08/1959, kis jŏ 63 sơnam, geh rlau 25 nam lơh broă tàm gah pờ tơlik jơnau đơs 6 dà đơs jơi bơtiàn kòn cau Tây Nguyên tàm Anih lơh broă sùm Anih Jơnau đơs Việt Nam, bơh là dùl nă cau mblàng dà đơs, cau đơs jơnau dà Jrai, tus dì gơnoar broă ătbồ. Gơwèt mờ oh mi lơh broă bal, cau lơh ƀăo ồng Kpă Si Mon là cau rềp mềl ngan, sơrmah sơrmài ngan, là krơh àng bè bơta tơryăng tơryồng mờ broă lơh, kờñ gơboh bơta niam chài jơi bơtiàn Tây Nguyên, sùm lơh ngan sền gàr bơh akhar cih, dà đơs tus ală bơhiàn niam chài krơi is ngan, ală jơnau đơs pơnđik niam bơnĕ ngan. Mờ jơnau đơs pờ tơlik mờ ală dà đơs kòn cau Tây Nguyên, ồng jơh nùs jơh tồr ngan, nền nòn ngan tơl akhar, tơl jơnau, tơl gùng đơs crih pơnđềm. Mờ ală cau bơyô iăt rơdio rềp mềl tiah rềp tiah ngài, măt Kpă Si Mon mờng kwèng ngan mờ ƀòn rềp, ƀòn ngài, làm gùt Tây Nguyên, cih tềl gĭt nđờ nam nhai mờ săp đơs lơh gơkờñ ngan cau iăt, sền uă ngan bơta sră ƀăo tàm gah pờ tơlik jơnau đơs.

Dơ̆ lòt tơ̆p ƀồc

Sang rài, tơnơ̆ uă nam lơh broă tàm Buôn Ma Thuột, càr Dăk Lăk, ồng neh rê ơm rlô bĭc tàm tiah ồng deh tềng jơng bơnơm Chư Mố, Bến Mộng bơh dà dờng Ba, gơwèt kơnhoàl Ia Pa, càr Gia Lai.

 Cau mblàng Lơ Mu K’Yến