VOV4.K’ho- Cau lơh broă sa mờ mpồl lơh sa kă bro tàm tiah Tây Nguyên gam lơh bal lơh gơlik ală tiah tam chi sa plai niam uă, geh pà mã sồ sơnđan măt mờ broă lơh tam phan lơh geh bơta niam, ring bal bè phan bơna. Broă lơh do gam cèng wơl cồng nha ai jơh bal làng bol lơh broă sa mờ ală mpồl lơh sa kă bro tăc phan phan mờ lơgar ndai in mờ kung dong kờl lơh broă sa sươn sre bơtàu tơnguh jăt gùng dà pa, mờ priă jền uă mờ kơ̆ kơl jăp.

Càr Lâm Đồng tŭ do geh pơgăp 10 rbô lồ sầu riêng mờ do là dùl tàm ală bơta phan lơh geh bơh sươn sre geh priă jền uă bơh càr dê. Ồng Võ Hữu Long, Kwang ătbồ Kông ty Tráč ñiệm Hữu hạn Một thàñ viên Lơh gơlik phan mờ kă bro Long Thủy tàm xã Lộc An, kơnhoàl Bảo Lâm, càr Lâm Đồng dê pà gĭt, drà mờ drà tăc mờ lơgar ndai ai plai sầu riêng in tŭ do là geh sùm ngan, mơya priă jền bơh tờm chi sa plai bơkah pơnrơ ngan do ngai sơlơ uă mờ geh sùm tŭ tiah tam geh lơh sră cih mat mã sồ sơnđan măt, loh làng song dơ pă ală broă tam, sơngka sền gàr, tơnhàu mờ lơh niam lài dùl êt mờ ơn tàm kơldung. Kwơmàng mờ broă geh pà mã sồ tiah tam, mpồl lơh sa kă bro neh gơtùi tăc mờ lơgar ndai jăt gùng dà dipal mờ kơrnoăt boh lam mờ cèng wơl priă cồng uă ai jơh bal cau tam mờ mpồl lơh sa kă bro in. Ồng Võ Hữu Long, đơs: Mã tiah neh pà rao, VietGap neh wil tơl jơh rao, tŭ añ hơ pơrgon mờ geh sră tăc mờ lơgar ndai gơtùi den giă añ blơi pơndrờm mờ drà den jơnhoa rlau bơh 15 tus 20 rbô đong. Gơwèt mờ ală bă ù neh pà mã, neh pơgồp bal lơh tàm ală broă lơh bơh he dê, den pa do añ neh kĭ geh 6 rbô tấn.

Tiah tam geh mã sồ sơnđan mat mờ broă rơndăp lơh tam phan gàr geh bơta niam gam cèng wơl cồng nha uă ai làng bol lơh broă sa mờ ală mpồl lơh sa kă bro tăc mờ lơgar ndai tàm tiah Tây Nguyên

Lơh gơlik tiah tam jăt ală broă lơh bal kung gam geh lơh pràn tàm càr Dăk Nông mờ uă bơta phan plai chi bè sầu riêng, plai màk, pơ ò, ƀơ. Uă tiah tam tàm ù tiah càr dê kung neh geh pà mã sồ sơnđan măt nàng drơng ai broă tăc mờ lơgar ndai in. Ồng Bùi Phú Tôn, Kwang ătbồ Kông ty Tráč ñiệm Hữu hạn Kă bro tăc blơi mờ lơgar ndai Nghiệp Xuân, xã Dăk Nia, ƀòn dờng Gia Nghĩa, càr Dăk Nông pà gĭt, mờ broă lơh gơs lơh bal ală broă, ală phan bơna bơh kông ty dê neh geh bơta niam uă mờ ndrờm bal ngan, cèng wơl priă jền uă tŭ tăc mờ lơgar ndai. Ồng Bùi Phú Tôn, đơs: Drà sồr he pal tăc uă mờ lơgar ndai jăt gùng dipal mờ kơrnoăt boh lam. Tăc mờ lơgar ndai jăt gùng dipal mờ kơrnoăt boh lam den gơ sồr pal geh mã tiah tam, mã anih ơn klơm jăt tơl ală jơnau sồr ngan ngồn, mờ ờ gơtùi tăc làng bol tăc is mờ lơgar ndai bè lài do.

Mò Nguyễn Thị Tình, Phó Kwang ătbồ Sở Nông nghiệp mờ Phát triển Nông thôn càr Dăk Nông pà gĭt, tus tŭ do, Kụk Sền gàr phan tam neh pà ai 38 càr in mã sồ tiah tam mờ mã anih ơn klơm. Nàng lơh geh tơl jơnau sồr geh pà mã sồ tiah tam, gơ sồr làng bol pal tam gơl broă tam phan, gròi sền geh bơta niam, ngan là gròi sền phan kis lơh aniai. Mờ broă geh pà mã sồ tiah tam, bàr pe bơta phan plai chi bơh càr Dăk Nông dê neh gơtùi tăc uă mờ lơgar ndai jăt gùng dipal mờ kơrnoăt boh lam bal mờ khà phan tăc mờ lơgar ndai uă rlau, priă jền jơnhoa rlau mờ làng bol geh kwơ rlau. Là càr geh rài lơh sa bal mờ lơh broă sa sươn sre là bơta pràn, Dăk Nông gam tơrgùm lơh pràn bơtàu tơnguh lơh bal ală broă lơh mờ tiah tam geh mã sồ sơnđan măt. Mò Nguyễn Thị Tình, đơs: Nàng lơh geh tiah tam den gơ jăt bal mờ hơ̆ là pal lơh ală broă lơh bal, nàng lơh geh tiah tam phan mờ tiah tam lơh geh bơta niam nàng jòi gĭt anih lơh gơlik, jòi gĭt anih tờm lơh gơlik. Bơta kwơ bơh tiah tam dê là he geh gĭt geh chi tam hơ̆ gam tam tàm tiah lơi, ñcau là cau gam lơh mờ jăt ală broă rơndăp lơh lơi, geh gàr ờdo ờdă sơl phan sa halà ờ. Tàm ù tiah càr den bơh Tỉñ ủy tus Ủy ƀan Ñân zân càr neh geh uă ngan jơnau sồr broă do. Tàm tơngume rơndăp tăp sèng wơl gah lơh broă sa sươn sre den kung gĭt nền ai tơmŭt lơh bal ală broă lơh nàng lơh gơlik geh tiah tam phan jŏ jòng, kơ̆ kơl jăp drơng măy mok lơh gơlik phan kung bè tăc mờ lơgar ndai tơnơ̆ do.

Tiah tam geh mã sồ sơnđan mat mờ broă rơndăp lơh tam pa gàr geh bơta niam gam cèng wơl cồng nha uă ai làng bol lơh broă sa mờ ală mpồl lơh sa kă bro tăc mờ lơgar ndai phan lơh geh mờ sươn sre tàm Tây Nguyên in. Broă do gam pơn jăt tai geh ală tiah tàm Tây Nguyên sền gròi ngan bơtàu tơnguh nàng gơtùi ai ală bơta phan lơh geh bơh sươn sre pràn tờm ngan tăc mờ dunia.

            Cau cih Công Bắc- Cau mblàng Lơ Mu K’Yến