Tơl bơta pơrlồm tàm internet

Cau chài cah rơña Ngô Huỳnh Phương Thảo, Mpồl cau chài cah rơña ƀòn dờng Hồ Chí Minh yal, pa do geh dùl nă cau bơyô mò dê geh tài khoản ngân hàng tàm internet gơtìp cau pơrlồm bè do. Cau pơrlồm pơn jồh cau bơyô mò boh bơr clip tàm Facebook, pah dơ̆ kờñ dùl phan bơna geh tơm 10 rơbô đong tàm 1 dơ̆. Tơnơ̆ mờ hơ̆ sồr cau gơtìp pơrlồm jào priă tàm tơwơr bal, roh priă kờp jơh rơlao 25 tơmàn đong. Bŭ lah cau do neh gơtìp yă tus anih lơh broă kwang àng, mơya tài măi tờm bơh tài khoản cau pơrlồm geh tàm lơgar Campuchia den tàng kal ke ngan kờñ geh toh wơl priă. Cau chài cah rơña Phương Thảo đơs là, tŭ cau gơtìp pơrlồm, ngân hàng pal pơgồp bal nền nòn mờ ală anih lơh broă geh gơnoar mờ ală ngân hàng ndai bơsong mhar, di lah ờ den priă gơtìp pơyua tus uă tài khoản mờ tă jơh priă. Cau chài cah rơña Ngô Huỳnh Phương Thảo sồr: “Cau hơ̆ pal pơgồp bal mờ ală anih lơh broă geh gơnoar nàng kơrian mơ tài khoản hơ̆ nàng tơmù bơta hoàc huơr mờ bơsong di jăt adăt boh lam. Ha là pơgồp bal mờ ală ngân hàng gơrềng bal tàm lơgar Việt Nam, kơrian mơ tài khoản geh priă bơh cau gơtìp pơrlồm pơyua tus”.

Jăt cau jăk chài kông nghệ thông tin đơs, tŭ do, ală broă pơrlồm geh lơh kal ke ngan, ngui kông nghệ kao. Den tàng, ờ mìng ală cau dờng sơnam, ờ git uă bè kông nghệ thông tin den tàng gơtìp pơrlồm, mờ geh bal cau gam kơnòm, git wă bè gah broă do kung neh gơs cau gơtìp pơrlồm bơh mpồl cau tìs dê. Mùl màl là pa do geh dùl broă pơrlồm pa, cau pơlồm sơmờm gơnoar dong kờl (Accessibility) tàm ờ uă bơta phan tàm điện thoại, bơh tŭ hơ̆ kơñao jơnau tơngit pờ tàm điện thoại, mật khẩu, mã Pil, OTP, hơ̆ sồng sơmờm geh gơnoar ngui bơh ngài, tă jơh priă tàm tài khoản bơh cau ngui mìng tàm 2, 3 phút. Kờp jơh priă gơtìp pơrlồm roh tus git nđờ rơhiang tơmàn đong.

Ƀộ Kwang àng yal lài tàm tơngai tus, broă lơh bơh cau tìs ngui kông nghệ kao geh rơ̆p ngai sơlơ gơguh uă. Ală ngân hàng mờ cau năc geh tài khoản priă pơyoa pơn jăt tai là ală cau bơh mpồl cau tìs do kờñ lơh. Thượng tá Cao Việt Hùng, Phó Kwang atbồ Phòng sồ 4, Kụk sền gàr bơta lơngăp lơngai internet mờ rơcang sơndră mờ cau tìs ngui kông nghệ kao (A05) gơwèt Ƀộ Kwang àng pà git, pa do geh uă cau ngui kông nghệ AI nàng pơrlồm, hòi facetime nàng yòng priă, lơh ờ ngan săp đơs mờ muh măt bè cau kwèng. Tềng đăp mờ bơta do, tàm tơngai tus, anih lơh broă geh gơnoar geh tơnguh broă pơgồp bal mờ ală mpồl lơh broă gơrềng bal nàng bơsong sim ờ di cau tờm mờ tài khoản ờ di cau tờm, pleh mờ bơta kă bro tài khoản nàng pơrlồm. “Pal tơnguh broă pơgồp bal đah Ngân hàng Dà lơgar, Ƀộ Kwang àng mờ ală mpồl lơh broă ai geh kòn gùng tơm priă nàng lơh ală broă pơgồp bal nàng tơmù bơta ngui tài khoản ngân hàng điện tử ờ di cau tờm. Nàng lơh broă do den geh 2 bơnah broă pal lơh, tài sim ờ di cau tờm den jơh ală broă tơrbŏ bal mờ dữ liệu dà lơgar bal mờ làng bol, gam tài khoản ờ di cau tờm den he lơh 1 broă tai là broă sền tơnơ̆”.

“3 ờ” nàng sền gàr să tờm

Tàm Ngân hàng Á Câu (ACB), tềng đăp mờ bơta pơrlồm tài khoản tàm internet mờ kông nghệ kao ngai sơlơ nền nòn, ồng Từ Tiến Phát, Kwang atbồ dờng Ngân hàng ACB pà git, Ngân hàng do tơrgùm tàm ală broă lơh bè: rơcang sơndră mờ bơsong mhar ală cau năc gơtìp pơrlồm in. Ngân hàng neh pơgồp bal mờ Ƀộ Kwang àng bal mờ Kụk Kông nghệ thông tin geh ală broă lơh nàng kơrian ală dơ̆ pơrlồm pa mờ ală phan yal lài cau năc in tŭ lơh broă di gơlan gơtìp rềs àr. Bol añ geh broă nàng gŏ gờñ ală gùng tơngŏ ờ ngan nàng bol añ rơcang sơndră. Tŭ gơlik geh gùng tơngŏ ờ ngan bơh ngân hàng den bol añ pơyoa mơ jơnau yal SMS nàng cau năc in. Bol añ pơyoa jơnau yal mờ tơngu me là cau năc gam pờ tàm dùl phan krơi is, di lah cau năc pơn jăt tai pờ den che khoă dŭt ndơl geh pờ tài khoản priă cau năc hơ̆ là mã OTP, bol añ geh cih tai dùl jơnau geh kwơ màng ngan yal lài cau năc in: Cau năc rơcang lài do là dơ̆ pờ nàng jun priă”.

Tềng đăp mờ broă pơrlồm mờ kông nghệ kao nền nòn ngan bè tŭ do, uă cau jăk chài kông nghệ mờ ngân hàng bơto sồr cau ngui pal sền gàr să tờm mờ broă lơh “3 ờ”: ờ mŭt tàm gùng krơi, ờ tơmŭt tàm điện thoại app krơi, bañ dờn ală jơnau sồr krơi. Jăt ồng Ngô Tấn Vũ Khanh, Kwang atbồ dà lơgar Gah Kaspersky tàm lơgar Việt Nam yal, tŭ do ală ngân hàng ndrờm geh tơl ală broă lơh nàng gàr niam bơh tàm phan lơh broă nàng gàr niam broă lơh bơh cau năc dê. Mơya, cau ngui tàm broă lơh dŭt ndơl pal git wă, git tàm broă rơcang lài ală dơ̆ pơrlồm pa tŭ do. “Jơnau gơkòl dŭt ndơl là cau ngui, mơya bơta pràn tàm broă rơcang sơndră lài mờ ală dơ̆ pơrlồm do ờ pràn ngan bè bơta git wă, kông nghệ den bŭ lah ngân hàng geh broă lơh kông nghệ niam bè lơi mờ cau ngui bơh ngân hàng dê gơtìp cau pơrlồm rơlăc rơliang ir kung kal ke sơl. Den tàng, ală ngân hàng pal bơsram broă lơh bơh ală ngân hàng dờng tàm dunia bè broă rơcang phan, jơnau git wă ai ală cau năc bơh ngân hàng dê in nàng cau năc geh sền gàr is”.

Nàng rơcang sơndră mờ cau tìs ngui kông nghệ kao, să tờm cau ngui tài khoản ngân hàng tàm internet pal geh jơnau yal, jơnau mblàng uă rơlao tai, sùm bơtơl is jơnau git wă pa, git ală bơta ờ niam bơh cau tìs dê nàng gơtùi sền gàr is să tờm tềng đăp mờ ală dơ̆ pơrlồm rơlăc rơliang ngan.