Cau pơgru mờ kơnòm bơsram tàm ală hìu bơsram kung gam tơnguh ngan bơsram wơl, lơh ngan bơsram wơl ală jơnau bơsram nàng dong ală kơnòm bơsram in mut tàm dơ̆ pơrlòng mờ nùs nhơm kơ̆ dơn uă, lơh geh cồng nha uă ngan rlau jơh.

Dơ̆ pơrlòng jơh bơsram kấp pe nam 2023, sền bal là kung gàr bè ờs bè nam 2022 sơl, mơya jơnau pal jat pơrlòng geh bàr pe bơta pa sồr ală kơnòm pơrlòng pal jòi gĭt nền nòn ngan. Ùr pơgru Lê Thị Minh Huế, atbồ ơdŭ 12A5, Hìu bơsram kấp pe Mạc Đĩnh Chi, kơnhoàl Chư Păh, pà gĭt: “Nàng dong ală kơnòm in gĭt wă loh làng bè ală bơta pa tàm jơnau pal jat pơrlòng jơh bơsram kấp pe nam do den cau pơgru atbồ ơdŭ mờ uă broă lơh, dơ̆ dùl là tàm tŭ jiơ rlô 15 phuk bồ jiơ, jiơ tơm bơh bơr bơh cau pơgru atbồ ơdŭ pah poh den bơh ală gah bè mpồl Zalo nàng yal tus ală kơnòm bơsram in gĭt ală bơta pa tàm dơ̆ pơrlòng do nàng ală kơnòm bơsram in lơh jat di mờ jơnau pal jat”.

Oh Nguyễn Thị Anh Thơ– ơdŭ 12A7, Hìu bơsram kấp pe Mạc Đĩnh Chi, kơnhoàl Chư Păh đơs: “Jat oh jòi gĭt mờ geh gĭt ală phan geh ai cèng mut tàm cơldŭ pơrlòng hơ̆ là gai cih, gai ci, thơk, măy tíñ at tê ờ geh bơta chài cih jơnau cih, bañ cèng mut tàm cơ̆dŭ pơrlòng ală phan bè măi kŭp săp đơs, kŭp rùp, ngan là điện thoại at tê”.

Bal mờ broă yal tơngĭt nàng kơnòm bơsram in gĭt loh jơnau pal jat pơrlòng, ală hìu bơsram tàm càr Gia Lai kung gam tơrgùm bơsram wơl ală jơnau pơrlòng jơh bơsram kấp pe. Ală mpồl ờs mờng bơt bơtàu tơngume, broă lơh, tàm cah kơnòm bơsram nàng geh rơndap broă lơh bơsram wơl ai gơ in di pal. Klau pơgru Đỗ Văn Hiếu, pơgru hìu bơsram kấp pe Đinh Tiên Hoàng, kơnhoàl Krông Pa pà gĭt: “Bè môn văn, bol añ sac rơ wah is kơnòm bơsram, kơnòm bơsram jak, ờ hoan  jak, ờ jak, ngan là kơnòm bơsram bơsram ờ jak, geh rài kis kal ke den bol añ sền gròi uă rlau tai, bơsram tai uă rlau nàng ală kơnòm bơsram in bơsir wơl ală jơnau bơsram ờ hềt gĭt, nàng ală kơnòm bơsram in kơ̆ nùs pin dờn tàm dơ̆ pơrlòng mờr tus.”

Klau pơgru Trịnh Văn Bình, Phó Kwang atbồ Hìu bơsram kấp pe Đinh Tiên Hoàng yal, hìu bơsram neh lam lơh bơsram wơl ai kơnòm bơsram in rơndap tap sèng wơl ală jơnau bơsram neh bơsram, bơto pơlam lơh ală bơta jơnau pơrlòng, nàng ală kơnòm in pin dờn mut tàm dơ̆ pơrlòng: “Lồi nhai 5 den hìu bơsram rơ̆p bơyai lơh dơ̆ pơrlòng tơrlòng lài jơh bơsram kấp pe tàm hìu bơsram, hìu bơsram rơ̆p lơh jat, yal tơngĭt jơnau sồr pal jat pơrlòng ai ală kơnòm bơsram in lài mờ tŭ mut tàm dơ̆ pơrlòng tơrlòng lài jơh bơsram kấp pe. Pơnđơl pràn lơh ngan nam do rơ̆p lơh geh 98,5%. Broă lơh bơsram wơl geh hìu bơsram rơndap lơh jat jơnau kơ̆p kờñ bơh ală kơnòm bơsram dê”.

Pơrlòng jơh bơsram kấp pe dà lơgar nam do, jơh gùt càr Gia Lai geh rlau 15 rơbô 200 nă cau pơrlòng cih mat tus bal dan pơrlòng; tàm hơ̆ geh mờr 14 rơbô 300 nă cau pơrlòng kấp pe, 483 nă cau pơrlòng gah bơto bơtê sùm, gam wơl là cau pơrlòng khat gơboh. Tàm kờp jơh khà kơnòm pơrlòng cih mat tus bal dan pơrlòng geh rlau 14 rơbô nă kơnòm pơrlòng cih mat tus bal dan sac rơwah mut bơsram Đại họk, Cao đẳng.  Càr Gia Lai neh geh broă rơndap lơh gơwèt mờ 41 tiah pơrlòng ngan ngồn.

Tơngai pa do, Ƀộ Giáo dụk mờ Đào tạo neh ai lơh jat sră nggal bơto pơlam ală Sở Giáo dụk mờ Đào tạo, Kụk Hìu bơsram- Ƀộ Quôk phòng bè bơyai lơh dơ̆ pơrlòng jơh bơsram kấp pe nam 2023, tàm hơ̆ yal tơngai pơrlòng nền cê bơh dơ̆ pơrlòng do dê.

Jat hơ̆, dơ̆ pơrlòng jơh bơsram kấp pe nam 2023 geh bơyai lơh tàm ală ngai 27, 28, 29 mờ 30/6/2023, tàm hơ̆, cau pơrlòng lơh sră tus bal pơrlòng tàm mho ngai 27/06, lơh jơnau pơrlòng tàm 2 ngai, ngai 28 mờ 29/6 mờ ngai 30/06 là ngai pơrlòng rcang lài. Ngai pơrlòng tơl môn geh Ƀộ rơndap tap sèng ngan ngồn bè do: Ngai 28/06, ƀùi drim pơrlòng môn Ngữ Văn, ƀùi mho pơrlòng môn Toán; ngai 29/06, ƀùi dim rơ̆p pơrlòng 2 jơnau pơrlòng Khoa họk tự nhiên mờ Khoa họk xã hội; ƀùi mho pơrlòng môn Dà Mỹ.

Bè broă rơndap lơh rcang lài, bơyai lơh pơrlòng jơh bơsram kấp pe nam 2023, Ƀộ Giáo dục mờ Đào tạo sồr Sở Giáo dục mờ Đào tạo đơng lam ală hìu bơsram kấp pe kờp sền, sền gĭt jơnau yal bơh kơnòm bơsram gam bơsram ơdŭ 12 tàm ală jơnau yal gah lơh broă dê, tàm hơ̆ geh jơnau yal bơh kơnòm bơsram dê mờ yal cồng nha bơsram bơh kơnòm bơsram dê.

Jat jơnau yal bơh Ƀộ Giáo dục mờ Đào tạo, tus 8 jiơ drim ngai 18/07, ală Sở Giáo dục mờ Đào tạo, ală mpồl cih mat tus bal dan pơrlòng rơ̆p yal cồng nha pơrlòng jơh bơsram kấp pe nam 2023 mờ ală hìu bơsram kấp pe pal lơh sir broă sền sơ wì dờp sră jơh bơsram kấp pe lơyài ngan rlau jơh tàm ngai 20/07. Lơyài ngan rlau jơh ngai 24/07, kơnòm pơrlòng geh pà sră dờp jơh bơsram kấp pe ing, họk ƀạ mờ ală bơta sră dờp geh gơrềng.