Jat Củ tịc Ủy ƀan Mặt trận dà lơgar Việt Nam ồng Đỗ Văn Chiến đơs, nàng rơcang ai pơrjum dơ̆ 7, Quôk hội khoă XV in, Đoàn Củ tịc Ủy ƀan Mặt trận dà lơgar Việt Nam neh dờp geh 63 tàm 63 yal wơl ală jơnau đơs, jơnau dan bơh cau tĕ khà mờ làng bol dê bơh Mpồl duh broă sùm Ủy ƀan Mặt trận dà lơgar Việt Nam ală càr, ƀòn dờng dê; 37 tàm 63 jơnau yal bơh ală mpồl kwang bàng Quôk hội dê; 23 jơnau yal bơh ală mpồl lơh broă geh jơng dê; 16 jơnau đơs, jơnau dan bơh ală kwang bàng tàm Đoàn Củ tịc Ủy ƀan Mặt trận dà lơgar Việt Nam, mờ kờp jơh 1 rbô 502 dơ̆ jơnau đơs. 

Ồng Đỗ Văn Chiến đơs nền, cau tĕ khà mờ làng bol jờng rơ ngan broă lơh kơryan, rơcang sơndră sa kuề sa kuà, broă ờ niam tềng đap bơta đơng lam bồ bơh Đảng dê pơn jat tai lơh geh cồng nha kuơmàng, tơl làm, “đơs pal gơ jat bal mờ lơh”, ngan ngồn ờ geh tiah kơryan, ờ geh ơm bơdìh, bulah cau hơ̆ là cau lơi; ală anih lơh broă ờ mìng bơsong di tŭ, kràñ cê, geh gùng geh dà gơ wèt mờ cau lơh tìs mờ gam ai wơl geh uă priă jền dà lơgar in.