VOV4.K’ho - Broă cau ùr dong kờl bal tơnguh bơtàu lơh sa neh geh ală kấp mpồl cau ùr tàm kơnhoàl Lâm Hà, càr Lâm Đồng lơh jăt geh cồng nha, pơgồp bal tàm broă dong kờl ală cau tàm mpồl cau ùr tơnguh bơtàu lơh sa, sơrlèt mờ kal ke brồ guh lơh pas.

Broă tam lagim tàm hìu krơh xã Phi Tô, kơnhoàl Lâm Hà

Tus tŭ do, Mpồl cau ùr kơnhoàl Lâm Hà neh pơgồp bal mờ Ngân hàng Cíñ sác – xã hội, Ngân hàng Nông nghiệp mờ Phát triển Nông thôn dong kờl cau ùr geh càn priă, ngui geh cồng nha ală khà priă. Bơh tŭ hơ̆, neh geh rơlao 5 rơbô nă cau ùr tàm mpồl geh càn priă kờp jơh khà priă geh càn rơlao 140 tơmàn đong; geh sùm 107 mpồl tềm pềr mờ càn priă mờ rơlao 4 rơbô nă cau tàm mpồl tus bal tềm pềr kờp jơh khà priă rơlao 9 tơmàn đong. Mờ broă ngui priă càn geh cồng nha neh dong kờl 480 hìu rơƀah geh cau ùr lơh tờm klàs mờ rơƀah. Mò K’ Soanh, Củ tịc Mpồl cau ùr xã Phi Tô, kơnhoàl Lâm Hà pà git: “Tàm broă tơnguh bơtàu lơh sa den tàm xã kung geh ờ uă cau geh pơnrơ jăk tàm broă tơnguh bơtàu lơh sa hìu nhă, rài kis lơh sa hìu nhă pas gơs rơlao mờ hìu ndai. Bơdìh hơ̆ tai ală cau tàm mpồl do gam git deh kòn di kơrhia, git ngui broă gơguh jăk khoa họk kỹ thuật tàm broă tam phan lơh sa suơn sre, bè broă lơh hìu jàl, hìu krơh... geh bơta kwơ broă lơh sa uă”.

VOV Tây Nguyên/Ndong Brawl mblàng