Pơgap 2 nam do, broă tac bro tơrnờm kòn cau Rơđê bơh bi H’Trang Niê ơm tàm ƀòn Kna A, xã Cư Mgar, kơnhoàl Cư Mgar, càr Dăk Lăk bơtàu tơnguh, khà tơrnờm tac ngai sơlơ uă. Jat bi Trang yal, kơnờm ngui mạng xã hội bè Zalo, Facebook, mut tàm ală mpồl tac bro phan… neh dong bi tàm tơrbŏ mờ cau blơi ƀuơn rlau mờ broă tac phan ờs mờng. Bal mờ hơ̆, bi gam geh Mpồl cau ùr tàm ƀòn lơgar yal tơnggit tus bal tàm mpồl cau ùr sơn đờm mut lơh broă halà ală ơdŭ bơto pơlam pờ tơlik tàm internet. Mìng mờ điện thoại ngac ngar geh tơrbŏ internet, bi gơtùi tus bal ơdŭ bơto pơlam bơh tàm hìu tơn. Kung jat bi Trang yal, bơh ngai mut tàm ală mpồl, bi git wil tơl rlau mờ sơrbac mhar tơngume ală broă lơh bơh Mpồl cau ùr kâp hơ đang pơlam lơh jat tus kâp hơ đơm, broă cribơyai jơnau tơnggit kung ƀuơn ngan sơl: “Añ kờñ geh bơsram mờ tìp mat lơh kwèng mờ ală oh mi cau ùr tàm do, git uă rlau tai bè broă lơh sa, tac bro, tam pà bal bè bơta chài lơh bè lơi nàng ring bal đah broă hìu bơnhă mờ broă bơdìh”.

Ờ mìng oh mi cau ùr tàm Mpồl mờ mpồl kwang bàng Mpồl cau ùr kung ƀuơn ngan sơl tŭ ngui mạng xã hội nàng lơh broă. Bi Nguyễn Thị Thanh Nga, Kwang atbồ Mpồl cau ùr thôn Đoàn Kết, xã Ea Mdroh, kơnhoàl Cư Mgar pà git: Ala mờ pal lòt yal tơn tus tơl nă cau in den tŭ do, mìng ngui điện thoại mờ jơh ală oh mi cau ùr tàm mpồl ndrờm gŏ jơnau yal mờ mhar ngan hơ wơl, lơh jat: “Tŭ do, geh Zalo den kâp hơđang pơyua ală sră nggal, sră jà halà ală broă den he gơtùi cùp wơl mờ pơnđàng tàm mat Zalo he dê nàng yal tơn tus ală oh mi cau ùr in, ală oh mi cau ùr rơp tàm cribơyai is. Mờ tus tŭ lòt pơrjum den kung mhar rlau, gơtùi tơrmù lơyah tŭ jơ, ờ huan roh tŭ jơ oh mi cau ùr dê”.

Ngui măi mok yal tơnggit jơnau gam ai tơnggŏ tàm broă ală kâp Mpồl cau ùr càr Dăk Lăk neh ai ngui phần mềm atbồ kwang bàng, cau tàm mpồl bơh Mpồl cau ùr dà lơgar lam lơh bơh nam 2021. Bi Ngô Thị Kim Long, Phó Củ tịc Mpồl tam klac cau ùr xã Cư Dliê Mnông, kơnhoàl Cư Mgar pà git, phần mềm do dong bi ƀuơn jat sền, atbồ broă lơh bơh rlau 1 rbô 700 nă cau tàm mpồl tàm kâp hơ đơm mờ ờ duh pal roh uă tŭ jơ prap gàr, tàm pơn drờm cih tàm sră pơ àr: “Añ neh geh Mpồl tam klac cau ùr kơnhoàl pơlam ngui bơta chài tơmut jơnau yal tơnggit cau tàm mpồl dê, khà kờp ală broă lơh dong kờl cau tàm mpồl. Añ gŏ ƀuơn ngan tài phần mềm do tơrgùm geh uă tơngume tàm broă lam lơh kơnòl broă mpồl mờ srơh cau ùr loh làng, mùl màl ngan”.

Nghị quyết pơrjum dờng dơ̆ 18, tơngai lơh broă bơh nam 2021 tus nam 2026 bơh Mpồl tam klac cau ùr càr Dăk Lăk dê git nền: Ngui măi mok yal tơnggit jơnau tàm broă lơh mpồl là 1 tàm 2 bơta tam gơl pa tàm broă lơh mpồl mờ srơh cau ùr. Jat hơ̆, pah nam Mpồl ndrờm lơh ală dơ̆ pơrjum, pờ ơdŭ bơto pơlam mờng chài lơh broă ai kwang bàng mpồl, bơto jơnau git wă ngui măi mok sồ tàm sơn đờm mut lơh broă, lơh sa, kă bro ai cau tàm mpồl cau ùr in. Mò Tô Thị Tâm, Củ tịc Mpồl tam klac cau ùr càr Dăk Lăk pà git: Nam do, mờ tơngume sơlơ ngui măi mok yal tơnggit jơnau tàm broă lơh Mpồl, ală kâp Mpồl rơp hòi jà cau tàm Mpồl jơh nùs lơh jat, tus bal ală dơ̆ pơrlòng ngui măi mok yal tơnggit jơnau. Mờ kung tă pơgồp jơnau đơs, sồr blơi tơl măi tíñ lơh broă ai Mpồl cau ùr kâp hơ đơm in mờ lam lơh tơnguh pràn jak ngui măi mok sồ ai cau tàm mpồl in: “Bol hi neh hòi jà blơi geh rlau 30 nơm măi tíñ rau. Tàm tơngai tus, bol hi rơp pơn jat tai hòi jà nàng jơh ală mpồl kâp hơ đơm ndrờm geh măi tíñ nàng lơh broă. Jơh ală kwang bàng Mpồl mờ cau tàm mpồl cau ùr ndrờm git ngui măi mok yal tơnggit jơnau, git tus măi mok yal tơnggit jơnau tàm tơngai 4.0 tŭ do”.

Ngui măi mok yal tơnggit jơnau neh pơgồp bơnah lơh gơlik bơta tam gơl pràn ngan tàm ală broă lơh bơh ală kâp Mpồl cau ùr tàm càr Dăk Lăk. Bơh hơ̆ tơnguh cồng nha ală srơh broă lơh, dong oh mi cau ùr mhar git ngui măi mok sồ, tus bal jơh nùs tàm broă lơh tam gơl sồ dà lơgar.