Tàm dơ̆ pơrjum cribơyai, Kwang bàng ala mat neh cribơyai, tă pơgồp jơnau đơs tơl bơta geh ngan tàm Jơnau rcang cih Adat dê, tàm hơ̆ tơrgùm lơh loh bàr pe akhar, jơnau đơs geh ngui ờ hềt di pal halà ờ hềt tơl làm, bơtơl lơh loh làng rlau tai bàr pe tơngume ờ hềt loh làng tàm Jơnau rcang cih Adat.

Mò Tô Thị Tâm, Củ tịc Mpồl tam klăc cau ùr càr Dăk Lăk đơs: ală jơnau tă pơgồp bơh ală kwang bàng dê neh tơrgùm lơh loh làng rlau tai uă tơngume neh geh cih tàm Jơnau rcang cih Adat, bè: pal gàr niam bơta ring bal ùr klau, sền gròi di pal tus mờ cau ùr, kơnòm ùr dềt. Broă lơh dong kờl, dờp gĭt, sền gàr, dong kờl cau gơtìp rềs àr, cau gam tàm broă sền gĭt nền là cau gơtìp rềs àr kờñ pal di tŭ mờ di ngan. Pal kơryan tơn bơh ală gah ƀuơn ngan gơtìp sơmờm nàng kă bro kòn bơnus, bè: lòt nhơl, lòt lơh broă hờ lơgar ndai, cau dờp kòn ròng, bau mờ cau lơgar ndai...