VOV4,K’ho- Tus wơl mờ broă lơh tơnơ̆ mờ ală ngai ơm rơlô satềp, ală cau chài đơs crih, tamya tàm mpồl đơs crih tamya kòn cau càr Dăk Lăk tus bal mờ ală tŭ bơsram tàp ai ală jơnau đơs crih pa in. Ồng Y Kô Niê, Kwang atbồ mpồl pà git, tơngai lài mờ satềp, ală cau tàm mpồl neh ai uă tơngai mờ bơta pràn bơsram tàp ai 2 broă lơh nàng chờ gờm nam pa mờ mang tam jào sơnam. Is mờ ală nam, tài gơrềng bơh kòp gơtờp, den tàng broă bơyai lơh đơs crih tamya mìng geh lơh tàm hìu chài rơgơi càr mờ geh pờ tơlik rùp tơn tàm ti vi mờ Youtube. Tơnơ̆ mờ satềp, gùt mpồl geh ai tơngai nàng lơh ală broă lơh đơs crih tamya dờng drơng tàm broă lơh kấp càr mờ lòt lơh tus tàm ală tiah nàng làng bol in sền tŭ bơta kòp Kovid-19 neh geh sền gròi. “Lài jơh là rơcang ai ală ngai chờ, ngai tơnkah bơh càr mờ dà lơgar in. Lài mờ satềp kung neh lơh bloh mờ tŭ satềp jơh den pơn jăt tai lơh jăt. Di lah bơta kòp gơtờp ờ gơtùi bơyai lơh den di gơlan geh kŭp rùp wơl ală broă lơh, jơnau đơs crih tamya mờ geh pờ tơlik tàm ală anih yal tơngit, ală pang yal tơngit mpồl bơtiàn bơh gah lơh broă do dê nàng làng bol, bal mờ bơyô tàm dunia gơtùi sền”.

Gam tàm càr Gia Lai, mpồl lam sồr ntrờn bơh mpồl đơs crih tamya tơrgùm bal Dam San gơwèt Sở Văn hoá-Thể thao mờ Du lịc càr Gia Lai kung neh lik lơh broă mờ ală broă lơh lam sồr, đơs crih tamya drơng làng bol tàm càr do in. lài do, pah nam, Mpồl neh lơh git nđờ rơhiang dơ̆ lam sồr ntrờn, mìng tàm ală tiah ngài, tiah làng bol kòn cau tàm càr Gia Lai. Mơya, nam 2021 pa do tài gơtìp bơh kòp Kovid-19, tơmù broă tơrgùm gal cau, den tàng mpồl geh tam gơl broă lam sồr mờ broă kŭp rùp video, tơlik tàm ală pang internet mpồl bơtiàn facebook, youtube jăt ală tơngu me krơi is. Bơta do geh dong kờl gàr niam kơnòl mờ tơngu me lam sồr geh ƀuơn tus mờ làng bol. Lŏ H’ Blup là kwang bàng tàm mpồl lam sồr ntrờn bơh Mpồl đơs crih tamya tơrgùm bal Dam San pà git: “Bol añ là ală kwang bàng lơh broă gah chài rơgơi, lơh broă lam sồr ntrờn. Bol añ pơgồp bal mờ broă đơs crih tamya nàng pơ-rài bồ tơngoh tơnơ̆ mờ 1 ngai lơh broă glar bòl. Bơh tŭ hơ̆, bol añ geh pơgồp bal mờ ală gùng dà broă lơh bơh Đảng, adăt boh lam bơh Dà lơgar dê. Bơh tŭ hơ̆, nàng làng bol wă, Đảng mờ Dà lơgar geh sền gròi ngan, drơng gàr rài kis làng bol in. bơdìh hơ̆ tai, lam sồr làng bol in wă, pleh mờ broă ờ niam bè bơta ờ niam tàm mpồl bơtiàn, ờ lơh aniai tus mờ să tờm bal mờ làng bol tàm ƀòn”.

Cau mblàng Ndong Brawl