VOV4.K’ho- Mờr 9 rbô nă klau pơnu jak ngan tàm tiah Tây Nguyên neh lòt gùng lơh kơnòl sền gàr dà lơgar. Bulah geh lơh tàm tơngai kòp Kovid-19 kung gam gơlik geh kal ke, mơya dơ̆ jàu dờp ling nam do geh lơh gàr niam ờdo ờdă, yŭ rơyùm, ngan ngồn là ngai chờ lòt ling bơh ală klau pơnu dê.  

Tàm dơ̆ jàu mờ dờp ling nam do, gùt càr Dăk Lăk geh 2 rbô 500 nă klau pơnu lòt lơh kơnòl ling klàng, 427 nă klau pơnu lòt lơh kơnòl kwang àng. Ală klau pơnu Dăk Lăk lòt ling dơ̆ do ndrờm gàr tơl khà bè cíñ trị, sơnam, pràn kơldăng să jan, bồ tơngoh bơsram sră.

Ala mat Ƀộ Kwang àng, Tỉñ ủy Dăk Lăk bal mờ 2, 3 mpồl, gah broă lơh, mpồl cau pơn jờng ală klau pơnu tàm Dăk Lăk lòt ling

Mùl màl, rlau 70 nă cau geh ƀằng đại họk, kao đẳng; 8 nă cau là đảng viên; klau pơnu là cau jơi bơtiàn kòn cau dùl êt nă cau geh rlau 50%. Tàm ngai lòt gùng lơh kơnòl ling klàng, cau ling pa Y Săm Mlô, ơm tàm sơnah ƀòn Ea Tam, ƀòn dờng Buôn Ma Thuột đơs: “Lòt gùng lơh kơnòl ling klàng là kơnòl dờng màng ngan bơh cau kơnòm să dê. Den tàng añ neh cih sră dăn lòt ling. Añ geh lơh ngan bơsram, pơlam tàp, lơh gơs niam kơnòl broă”. Càr Lâm Đồng Nam do geh 1 rbô 150 nă klau pơnu lòt ling. Do là ală klau pơnu jak ngan geh rơ wah bơh 12 kơnhoàl, ƀòn dờng tàm càr. Dơ̆ jàu mờ dờp ling geh lơh yŭ rơyùm tàm ală tiah,  gàr niam ờdo ờdă mờ geh kuơ.

                                                Ngai chờ lòt ling tàm ƀòn dờng Kon Tum

Nam do, càr Dăk Nông geh rlau 1 rbô nă klau pơnu lòt ling, tàm hơ̆ mờr 900 nă cau lòt lơh kơnòl ling klàng, rlau 100 nă cau lòt lơh kơnòl kwang àng làng bol. Tàm khà klau pơnu bơh càr dê lòt gùng lơh kơnòl sền gàr dà lơgar dơ̆ do, jơh ală ndrờm là đoàn viên lơm, geh 11 nă cau neh jơh bơsram kao đẳng, đại họk mờ geh rlau 50% klau pơnu là cau jơi bơtiàn kòn cau dùl êt nă cau.

Tàm dơ̆ jàu ling nam do, Dăk Lăk geh 2 rbô 500 nă klau pơnu lòt lơh kơnòl ling klàng, 427 nă klau pơnu lòt lơh kơnòl kwang àng

2 rbô 656 nă klau pơnu bơh càr Gia Lai dê kung neh lòt gùng lơh kơnòl sền gàr dà lơgar. Tàm khà ală klau pơnu càr Gia Lai lòt ling dơ̆ do geh ƀằng đại họk, kao đẳng rlau 1,4%, geh 22 nă cau geh Đảng mờ rlau 60% là cau jơi bơtiàn kòn cau dùl êt nă cau. Đơs lài mờ tŭ lòt ling, cau ling pa Nguyễn Bá Kiên, ơm tàm sơnah ƀòn Thắng Lợi, ƀòn dờng Pleiku pà git: “Oh chờ hờp ngan mờ pơn iờ să ngan tŭ he là cau tàm pơn jat cơnđuà jơng bèp ồng dê lòt gùng lơh kơnòl sền gàr dà lơgar. Oh pơn iờ să ngan tŭ geh mut tàm mpồl ling cau ling wa Hồ nàng tơnguh bơhiàn kac màng bơh hìu bơnhă mờ jơh gùt jơi bơtiàn dê, sòl àng oh in bơta pin dờn, bơta pơn iờ să. Mờ kung gơ lơh rơm nùs sơl, ờ hềt quèng tŭ pal tus dùl tiah pa mờ rài kis pa, oh geh lơh ngan bơsram, pơlam tàp mờ mhar gơ dờp mờ tiah ơm kis pa nàng lơh bè lơi dipal mờ jơnau nting tơngkh bơh ală kwang đơng lam bồ tàm ƀòn dờng dê mờ ală jơnau nting tơngkah bơh mè bèp oh dê”.

      Dơ̆ jàu mờ dờp ling geh lơh yŭ rơyùm gàr niam ờdo ờdă rơcang sơndră kòp Kovid-19 tàm Gia Lai

Tàm càr Kon Tum, broă lơh jàu mờ dờp ling kung geh lơh yŭ rơyùm, sơbac mhar ngan tàm àng drim ngai 16/02. Nam do, càr geh 800 nă cau lòt ling, tàm hơ̆ 8 nă cau là kông cứk viên cứk, 1 nă đảng viên. Cau ling pa Phạm Hoàng Quốc, ơm tàm sơnah ƀòn Quyết Thắng, ƀòn dờng Kon Tum neh geh pơ ùr mờ dùl nă kòn dềt, să tờm gam lơh broă tàm dùl kông ty adat boh lam tàm ƀòn dờng Hồ Chí Minh lòt ling dơ̆ do pà git: “Ngai do tàm ngai lòt ling añ chờ hờp ngan mờ kung bè git nđờ nă cau ndai, mờ kơnòl bơh dùl nă làng bol dê den añ pơn iờ să mờ bơta hơ̆. Mpồl ling mờ añ tus nàng lơh kơnòl bơh dùl nă làng bol dê là Trung đoàn 990 mờ jơnau kờñ añ dê là lơh gơs jak ngan kơnòl broă. Bulah kal ke, bulah bòl glar kàr lơi añ kung sùm geh pơn đơl jơh pràn gơtùi”.

                                            Chờ hờp ngai lòt ling tàm Dăk Nông

Lơh jat broă lơh rơcang sơndră kòp Kovid-19, jơh ală cau lòt ling bơh 5 càr Tây Nguyên dê ndrờm neh geh cit sơnơm vaccine ding dơ̆ 2 mờ ding dơ̆ 3; lài mờ ngai lòt ling geh xét nghiệm Sars KoV-2 gàr niam 100% mut tàm mpồl ling ờdo ờdă, ờ bơtờp kòp Kovid-19. Ală tiah geh oh kòn lòt ling lơh niam broă lơh lam sồr làng bol, pơgồp bơnah nàng ngai jàu mờ dờp ling nam do gơ gơs là ngai chờ lòt ling, lơh gơlik nùs nhơm duh hồl, klau pơnu chờ hờp lòt gùng lơh kơnòl sền gàr dà lơgar.

Cau mblàng K’Duẩn