VOV4.K’ho - Tàm càr Khánh Hoà tŭ do gam lơh 2 rơndăp broă lơh gùng ntoăt jờl đah tô-đah jum mờ bơta jòng 54 kơi sồ. Ală ƀộ, gah lơh broă dà lơgar, càr Khánh Hoà gam mhar lơh jăt 2 Rơndăp broă lơh gùng ntoăt jờl tơrbŏ Vân Phong-Nha Trang mờ Rơndăp broă lơh gùng ntoăt jờl Khánh Hoà-Buôn Ma Thuột.

                             Gùng trồm Dốc Sạn tàm gơl gùng Nha Trang-Cam Lâm gam geh lơh

Ală rơndăp broă lơh gùng ntoăt jờl lơh gơs geh pơgồp bal tơrbŏ, ai geh bơta niam nàng tiah đah jum tàm gùl lơgar tơnguh bơtàu mhar rơlao. 8 nhai do, sơrlèt mờ uă kal ke tài bơh kòp kovid-19, trồ tiah ờ niam, Rơndăp broă lơh ờ uă gơl gùng ntoăt jờl tàm gơl gùng đah tô-đah jum hờ đah măt tơngai lik tơngai bơh nam 2017 tus 2020, gơl gùng lòt gan càr Khánh Hoà mhar geh lơh. Rơndăp broă do geh tam pà gơs 2 bơnah broă, tàm hơ̆ geh gơl gùng Nha Trang-Cam Lâm jòng rơlao 49 kơi sồ mờ gơl gùng Cam Lâm-Vĩnh Hảo jòng 5 kơi sồ, geh bơcri lơh jăt broă lơh BOT, tàm hơ̆ geh priă dà lơgar mờ priă cau dùl nă să bơcri. Tus tŭ do, rơndăp broă lơh gùng Nha Trang-Cam Lâm neh sơrlèt mờ khà rơndăp broă geh ai rơlao 1 nhai, kờp dŭ geh lơh gơs tàm nggùl nam 2023, gờñ rơlao mờ rơndăp broă neh geh ai 3 nhai.

Cau mblàng Ndong Brawl