Tus tŭ do 60% sră nggal kâp xã càr Kon Tum dê neh geh bơsong tàm tiah internet, lơh geh jơnau kờñ sồr lơh tus nam 2025. Bơdìh hơ̆ tai, rlau 16 rbô 800 lồ chi tam, 142 anih lơh sa sươn dờng geh đòm jăt ală gơguh jak mờ măy mŏk; rlau 116 rbô 600 hìu lơh broă sa sươn sre mŭt tàm ală drà kă bro phan tàm internet. Tus tŭ do, càr Kon Tum neh geh 48 xã lơh tơl ală broă jàu ƀòn lơgar pa.

Bal mờ hơ̆, càr kung neh geh 21 thôn lơh geh tơl broă jàu tiah làng bol ơm kis ƀòn lơgar pa lơh krơh lài, 65 thôn, ƀòn jơi bơtiàn dồ êt nă cau lơh geh tơl broă jàu ƀòn lơgar pa. Do là dùl tàm ală bơnàng jă kwơmàng nàng càr lơh jăt ală broă lơh pa, bơceh lơh mờ dipal nàng kờñ chồl tơngguh tam gơl sồ tàm broă lơh sa sươn sre mờ bơtàu tơngguh ƀòn lơgar ngăc ngar.