Củ tịc lơgar ồng Tô Lâm neh ưn ngài Mpồl duh broă Đảng, Dà lơgar, Quốk hội, Cíñ phủ mờ Măt trận lơgar Lào bơ̆t bơtàu dà lơgar neh pơyoa jơnau tam pà moăt jrùng bè broă Tổng Ƀí thư ồng Nguyễn Phú trọng sang rài, lời ies dà lơgar tàm 02 ngai mờ kwơ màng geh ai Mpồl kwang bàng kấp dờng geh Tổng Ƀí thư, Củ tịc lơgar Lào lam bồ tus Ies tơ̆p ƀồc, tơlik nùs nhơm oh mi nền nòn, đềt mềr, niam bơnĕ, dong kờl bal, tam pà bal ală bơta niam bơta kal ke đah bàr Đảng, bàr dà lơgar bal mờ làng bol bàr lơgar.

Củ tịc lơgar ồng Tô Lâm đơs nền bŭ lah tàm gơnoar broă lơi, Tổng Ƀí thư ồng Nguyễn Phú Trọng kung sùm sền kwơ lài ngan, ai geh broă sền gròi is ồn, đềt mềr mờ kăc màng lơgar Lào, đềt mềr mờ ală kwang bàng Đơng lam lơgar Lào, tàm hơ̆ geh să tờm ồng Thongloun Sisoulith, sùm drơng gàr mờ bơ̆t bơtàu ai bơta git gơ̆p tam klăc bal đah pe Đảng, pe dà lơgar bal mờ làng bol pe lơgar Việt Nam – Lào – Campuchia, sền do là bơta pal geh niam, kơrnoăt kis niam, bơta kwơ màng lài ngan gơwèt mờ lơngăp lơngai, bơtàu tơnguh bơh tơl lơgar dê.