VOV4.K’ho - Mờ kờp jơh bă ù lơh sa suơn sre rơlao 500 rơbô lồ mờ mpồl phan ròng tus rơlao 700 rơbô nơm, bal mờ ală bơta niam bè trồ tiah, ù tiah, càr Gia Lai geh uă bơta ƀuơn nàng ngui niam ală bơta kwơ bè trồ tiah, ù tiah, càr Gia Lai geh tơl bơta ƀuơn nàng tơnguh bơtàu lơh sa suơn sre. Lơh sa suơn sre kung là gah gam geh càr Gia Lai ai tơl bơta ƀuơn nàng hòi jà bơcri priă. Tàm pơrjum hòi jà bơcri priă nam 2022, càr Gia Lai pa geh bơyai lơh tàm ngai 21 nhai 05 pa do, ồng Võ Ngọc Thành, Củ tịc UɃÑZ càr Gia Lai đơs: Càr ai geh bơta niam nàng hòi jà mpồl lơh sa kă bro bơcri priă tàm gah lơh sa suơn sre. Cau ai tơngit jơnau đơs Việt Nam neh geh dơ̆ lùp ồng Võ Ngọc Thành, Củ tịc UɃÑZ càr Gia Lai bè tơngu me do:

                                              Ồng Võ Ngọc Thành, Củ tịc UɃÑZ càr Gia Lai

-Ơ ồng, tơngai pa do, càr neh geh uă cồng nha lơi tàm broă hòi jà bơcri priă tàm gah lơh sa suơn sre?

Ồng Võ Ngọc Thành: “Mờ bơta niam bè bơta pràn ù tiah, trồ tiah, ală nam do, mờ broă bơto sồr bè tơnguh bơtàu lơh sa suơn sre kông nghệ kao, lơh sa mờ măi mŏk bè lơh gơs ală bơta phan geh lơh bơh broă lơh sa suơn sre, den càr Gia Lai neh geh broă tam gơl pràn kơl dang, hòi jà geh broă sền gròi bơh ală cau bơcri priă mờ ală tập đoàn dờng kơlôi sơnơng, jòi nàng git mờ tus bal bơcri priă. Geh ờ uă tập đoàn dờng, mpồl lơh sa kă bro dờng bè Doveco, Trường Hải, Hoàng Anh Gia Lai kung gam tơrgùm tàm ală gah bơcri bè lơh sa suơn sre. Geh ờ uă mpồl lơh sa kă bro neh sơn đờm mờ lơh jăt ală broă lơh sa bol añ đơs là geh cồng nha ngan, neh ai geh bơta hòi jà pràn gơwèt mờ ală cau bơcri priă ndai; mờ ai geh broă tam gơl tờm ngan tàm broă tam gơl phan tam tàm càr mờ lơh gơs ală tiah tam phan tơrgùm bal. Tàm hơ̆, neh ai geh broă pơgồp bal tàm broă lơh sa, lơh gơs phan ngui sa, tăc phan, lơh broă lơh sa suơn sre càr Gia Lai lài ngan geh broă tam gơl pa pràn. Priă geh bơh ală cau tàm mpồl, làng bol geh gơguh; muh măt ƀòn lơgar lơh broă sa neh geh gơguh rơhời, pơgồp bal uă ngan tàm broă lơh gơs broă bơ̆t bơtàu ƀòn lơgar pa tàm ală tiah càr Gia Lai dê”.

                     Kơphe là dùl tàm ală phan tam tờm ngan tàm gah lơh sa suơn sre càr Gia Lai dê

-Tơngai do, Tỉñ ủy mờ UɃÑZ càr Gia Lai neh ai tai ală bơta ƀuơn lơi nàng hòi jà mpồl lơh sa kă bro dờng, mpồl lơh sa kă bro lơgar bơdìh bơcri priă tàm gah lơh sa suơn sre ơ ồng?

Ồng Võ Ngọc Thành: “Nghị quyết Đảng ƀộ càr dơ̆ 16 neh ai geh 4 broă lơh mờ tơnơ̆ do bơtơl tai dùl broă lơh tai là 5 broă lơh. Bol añ đơs là do là ală gùng dà tờm ngan nàng chồl pràn ai ală gah tơnguh bơtàu mờ kung là bơta pal git nàng UɃÑZ càr Gia Lai bơ̆t bơtàu ală rơndăp broă mờ broă lơh nàng lơh jăt nghị quyết do. Nghị quyết lài ngan bè bơ̆t bơtàu cau lơh broă gơwèt mờ mpồl lơh broă cíñ trị tàm ală kấp nàng gàr niam di pal mờ bơta kờñ bơh kơnòl pa dê. Nghị quyết dơ̆ bàr bè bơ̆t bơtàu broă lơh ndrờm bal nàng drơng tàm broă tơnguh bơtàu lơh sa. Nghị quyết dơ̆ pe bè chồl pràn broă hòi jà ală bơta pràn ai broă bơcri priă ală gah bè là lơh sa suơn sre kông nghệ kao, lơh sa mờ măi mŏk lơh gơs phan, năng lượng lơh geh wơl mờ nhơl chờ tus nam 2030 (Nghị quyết sồ 07 ngai 20 nhai 02 nam 2022). Nghị quyết dơ̆ poan bè tơnguh bơtàu tơlir, bè broă atbồ, sền gàr mờ tơnguh bơtàu brê, tơnguh bơta kơl dìng bơh brê mờ ai geh broă lơh sa làng bol in tàm tiah mƀur chi brê. Mờ nghị quyết dơ̆ pram pa geh tơlik bè broă tam gơl sồ. Tŭ do, càr tơlik ờ uă broă lơh, tàm tơngu me hơ̆, geh bơ̆t bơtàu ờ uă broă lơh di pal mờ broă bơcri priă, tơnguh bơtàu kung bè ală broă lơh nàng hòi jà ală bơta pràn bơcri priă nàng lơh bè lơi ai geh tiah niam ngan ai cau bơcri priă in tus mờ ơm tơn bơcri priă tàm càr”.

-Nàng gah lơh sa suơn sre tàm Tây Nguyên đơs bal, tàm hơ̆ geh broă lơh sa suơn sre càr Gia Lai tơnguh bơtàu di pal mờ bơta geh, bơta pràn neh geh lài, càr kơ̆p kờñ, dan geh jơnau lơi mờ dà lơgar lah ờ ơ ồng?

Ồng Võ Ngọc Thành: “Añ kơlôi là ntrờn, tam gơl ală phan tam bơh tiah đah jum măt tơngai mŭt dà lơgar tus mờ Tây Nguyên là dùl gùng dà broă lơh tàm tơnơ̆ do. Mơya lơh bè lơi nàng he lơh gờñ, lơh mhar den ală càr kung gam kơlôi sơnơng gùng dà broă lơh bơh tơl càr dê tàm tơngu me tơrbŏ bal tiah. Añ kơlôi là, tus do, Ƀộ Cíñ trị gam rơcang tơn jơh nghị quyết sồ 10 mờ 12 bơh Ƀộ Cín trị, mờ bơ̆t bơtàu kơ cế tơnguh bơtàu tiah Tây Nguyên. Añ kơ̆p kờñ Nghị quyết do geh ai bơta pràn pa, bol añ rơcang kơlôi sơnơng, tus bal tơl tàm Nghị quyết do. Lơh bè lơi nàng Tây Nguyên geh broă lơh kơl jăp bal mờ pràn kơl dang rơlao tàm tơngai tus, nàng lơh ală bơta geh pràn mờ Tây Nguyên neh geh lài. Dơ̆ bàr là pal geh kơ cế is ai Tây Nguyên in kung ndrờm bè pa do geh tơlik mờ tiah đah jum măt tơngai mŭt dà lơgar den geh bơsong bơta kal ke ai Tây Nguyên in sơl nàng tơnnguh bơtàu”.

-Ơi, dan ưn ngài ồng!

Cau mblàng Ndong Brawl