Đơs tàm dơ̆ sơn đờm pơrjum, Phó Thủ tướng Cíñ phủ, Củ tịc Mpồl duh broă đơng lam tiah Tây Nguyên Trần Lưu Quang đơs nền: Nàng bơtàu tơnguh kơl jăp tiah Tây Nguyên di jăt jơnau kờñ, jơnau neh geh ai tàm Nghị quyết sồ 23 bơh Ƀộ Cíñ trị dê neh ai, Thủ tướng Cíñ phủ neh tơlik rơndăp broă Bơtàu tơnguh lơh sa mpồl bơtiàn pơgồp bal mờ sền gàr lơngăp lơngai, sền gàr dà lơgar tàm ù tiah Tây Nguyên dê.

Pơrjum dơ̆ do cri bơyai ală broă lơh nàng mhar lơh jăt jơh ală tơngu me tàm rơndăp broă neh geh ai. Đơng lam bal pơrjum, Đại tướng Tô Lâm, Kwang geh jơng tàm Ƀộ Cíñ trị, Ƀộ trưởng Ƀộ Kwang àng pin dờn là, đảng ƀộ, gơnoar atbồ, mpồl ling mờ làng bol ală càr Tây Nguyên geh sơrlèt mờ ală kal ke, bơta lòng, lơh geh cồng nha kơnòl broă bơtàu tơnguh lơh sa mpồl bơtiàn, gàr niam lơngăp lơngai, sền gàr dà lơgar, gờñ ai Tây Nguyên bơtàu tơnguh pràn, tơl ală bơta mờ kơl jăp.