Drim ngai 24/07, Thủ tướng Cíñ phủ ồng Phạm Minh Chính đơng lam pơrjum Cíñ phủ mìng dùl tơngume bè lơh adat boh lam nhai 07 nam 2024 nàng cribơyai, sền sơ wì tă pơgồp jơnau gơwèt mờ Rơndăp broă lơh Adat Ồs đèng (tam gơl); Rơndăp broă lơh Adat lơh broă; Sồr lơh Adat bơta jal mhar ngan; Sồr lơh Adat Khoa họk mờ Kông nghệ (tam gơl) mờ Jơnau neh lơh nền gùng dà broă lơh bơcri priă lơh gùng rơndeh ồs lòt mhar tàm gơl gùng tiah đah Tô – đah Jum.

Thủ tướng đơs sùm, bơdìh mờ broă pal sền dờng màng bè khà, lơh jat di tŭ tơngai, pal is ồn sền gròi ngan tus bơta niam ală sră nggal geh gơrềng adat boh lam dê; tàm hơ̆, Thủ tướng is ồn tơngkah tam pà kấp, tam pà gơnoar, lòt bal mờ tam pà priă jền, tơnguh uă bơta pràn jak lơh jat bơh kấp hơđơm dê, lơh ală phan jat sền, lòt sền; rcang lài kơryan sa kuề sa kuà mờ bơta ờ niam tàm broă lơh sră nggal geh gơrềng adat boh lam. Thủ tướng sồr, pal sền gròi ngan broă lơh tơrmù sră nggal gơnoar atbồ, tơn jơh broă lơh “dan- pà”, tơrmù lơh lơngeh lơngàñ ai ală anih lơh broă, làng bol, mpồl lơh sa kă bro in, ngan là priă tă lơh lơh jat tŭ pal lơh ală sră nggal gơnoar atbồ jat nùs nhơm tam gơl pa sră nggal gơnoar atbồ mờ Cíñ phủ sùm bơyai lơh pơrjum pah quý dê.