VOV4.K’ho - Ngai òr (16/02), tàm hìu lơh broă Cíñ phủ, Thủ tướng ồng Phạm Minh Chính đơng lam dơ̆ pơrjum Cíñ phủ jăt tơngu me bơ̆t bơtàu adăt boh lam nhai 2 nam 2022.

                                       Cíñ phủ pơrjum tơngu me bơ̆t bơtàu adăt boh lam

Đơs tàm dơ̆ pơrjum, Thủ tướng ồng Phạm Minh Chính sồr đơs loh, pơrjum do, Cíñ phủ cri bơyai pơn jăt tai lơh gơs ală rơndăp broă adăt, bơta do geh tàm gùng dà broă lơh dờng bơh Đảng, lơh jăt Nghị quyết pơrjum dờng dơ̆ 13 Đảng dê neh ai loh gàr niam broă bơcri priă ai broă bơ̆t bơtàu 3 broă lơh pràn jŏ jòng di pal, tàm hơ̆ geh broă lơh pràn bè thể cế. Den tàng, he sùm bơyai lơh ală dơ̆ pơrjum, cri bơyai nàng lùp lăp bal jơnau mờ ală cau jăk chài, cau khoa họk, cau atbồ nàng bơ̆t bơtàu broă lơh adăt boh lam, tàm hơ̆ geh gơnoar bơh ală kấp. Bơta lơi gơwèt gơnoar broă bơh Ƀộ Cíñ trị, Quốk hội den he pal rơcang mhar, yal jăt di mờ kơrnoăt geh ai. Thủ tướng sồr ală Ƀộ trưởng, kwang atbồ gah lơh broă dà lơgar pal đơng lam tơn, lam sồr broă bơ̆t bơtàu thể cế do, tàm hơ̆ geh ală adăt gơrềng bal tus mờ gah, mpồl lơh broă să tờm, bơ̆t bơtàu ală Nghị định, Thông tư.

Cau mblàng Ndong Brawl