VOV4.K’ho- Rơndap broă lơh gùng Trường Sơn Đông lòt gan 7 càr tiah tàm gùl lơgar mờ Tây Nguyên gam rơcang lòt gan brê dà lơgar Chư Yang Sin càr Dăk Lăk mờ brê dà lơgar Bidoup Núi Bà, càr Lâm Đồng. Là rơndap broă kuơmàng dà lơgar, lòt gan ù tiah kuơmàng bè tiah ơm kis brê bơnơm, geh sền gàr nền nòn, đơs ngan den rơndap broă lơh pal geh lơh nền nòn mờ kràñ cê, jat di ală jơnau cih bơh adat boh lam dê. Mơya, broă lam lơh ngan ngồn neh ờ lơh jat ală jơnau cih, ală broă rơndap lơh. Mpồl tờm lơh mus kơl brê nàng lơh gùng mờ cau tờm brê bal mờ gơnoar atbồ tàm ƀòn lơgar ờ git tơn.  

Tàm Tiểu khu 1383 mờ 1402 (Brê dà lơgar Chư Yang Sin- càr Dăk Lăk) là tiah mờ Mpồl atbồ rơndap broă lơh 46, Ƀộ Tổng tham mưu, Ƀộ Quôk phòng gam lam lơh rơndap broă lơh gùng Trường Sơn Đông bơnah broă bơcri Đ41. Tàm do, dùl gơl gùng jòng rlau 7 kơi sồ, lòt gan 2 tiểu khi neh geh cò tơnring, bal mờ rlau 15 lồ brê gơtìp mus kơl. Jơh ală chi brê tàm gơl gùng do ndrờm gơtìp tờ, cò tơnring mờ gam tềl lời wơl tơn; mìng geh 2, 3 tờm chi gam pừ jat kềng gah gùng. Ồng Y Te Bkrông, kwang atbồ Hạt kiểm lâm kơnhoàl Lăk, càr Dăk Lăk pà git, ờ git loh broă cò tơnring geh lam lơh bơh tŭ lơi. Ală anih lơh broă geh gơnoar bơh kơnhoàl mờ càr dê mìng git gŏ broă do tàm lồi nhai 1 pa do. Ai ồng Lộc Xuân Nghiã, kwang atbồ Brê dà lơgar Chư Yang Sin mblàng lơh loh: Brê gơtìp cò tơnring uă, di tàm tŭ ală anih sền gàr brê tơrgùm tàm broă sền gàr ală bă brê rềp ƀòn làng bol ơm kis. Bal mờ hơ̆, mpồl kung sền ờ sơp, ờ git là dùl mpồl lơh broă dà lơgar lam lơh mus kơl brê tŭ ờ hềt geh ai gơnoar: “Oh mi tàm anih gròi sền neh sền ờ sơp, sơnơng là hơ̆ là anih lơh broă dà lơgar, den tàng uă ngan là sền gàr tàm ală bă brê hờ bơdìh geh jơnau pơhìn gơtìp mus kơl lơh mìr. Bè broă atbồ, gơnoar mờ kwang đơng lam bồ, ală cơldŭ, mpồl lơh broă bơh brê dà lơgar dê den broă sền sơ wì, gròi sền lòt rê kal ke ngan, tàm ală tiah brê ngài ờ hềt gơtùi lòt tus”.

Gơl gùng jòng 7 kơi sồ gơtìp cò tơnring gan brê dà lơgar Chư Yang Sin

Ồng Võ Thành Huệ, Phó Củ tịc Ủy ƀan Ñân dân kơnhoàl Lăk, càr Dăk Lăk đơs nền, mpồl tờm lơh gùng Trường Sơn Đông neh ờ yal mờ gơnoar atbồ mờ tràl sơbil ai măi mok mut cò tơnring brê kuơmàng bơh brê dà lơgar Chư Yang Sin dê. Ồng Huệ pà git, 15 lồ brê pa gơtìp mus kơl tŭ do kung ờ hềt geh kơrnuat tam gơl jơnau kờñ ngui ù, tài gơnoar tam gơl gơnoar Thủ tướng Cíñ phủ. Kơnhoàl sền gŏ do là broă lơh tìs adat boh lam mờ gam pơgồp bal mờ ală sở, gah broă lơh càr dê nàng lùp sền, lơh loh: “Ală mpồl tờm lơh ờ yal mờ gơnoar atbồ tàm ƀòn lơgar, ờ hềt tam gơl jơnau kờñ ngui, tràl sơbil ai măi mok, phan bơne mut lơh bè do là lơh tìs jơnau sồr bơh dà lơgar dê. Kơnhoàl neh jàu ai Hạt kiểm lâm in lùp sền, lơh broă mờ mpồl tờm brê là Chư Yang Sin, yal rê hờ Sở Nông nghiệp mờ Phát triển Nông thôn, Ci kụk Kiểm lâm càr in nàng geh gùng dà đơng lam bơsong”.

Ồng Nguyễn Quốc Hưng, Kwang atbồ Ci kụk kiểm lâm càr Dăk Lăk pà git, bă tiah mờ mpồl tờm lơh gùng mus kơl brê gơ wèt bơnah broă bơcri Đ41 bơh rơndap broă lơh gùng Trường Sơn Đông dê bơh Mpồl atbồ rơndap broă lơh 46, Ƀộ Tổng tham mưu, Ƀộ Quôk phòng lơh ala mat tờm bơcri priă. Do mìng là dùl tàm uă bơnah broă bơcri priă bơh rơndap broă lơh gùng Trường Sơn Đông dê, kờp dŭ jòng mờr 36 kơi sồ bal mờ git nđờ jơt lồ brê kuơmàng bơh brê dà lơgar Chư Yang Sin dê kờñ tam gơl. Ồng Hưng Đơs nền, càr Dăk Lăk mờ Ƀộ Nông nghiệp mờ Phát triển Nông thôn neh pơlam ngan ngồn Mpồl atbồ rơndap broă lơh 46 lơh ală sră nggal nàng tam gơl jơnau kờñ ngui brê. Bulah bè hơ̆, tŭ ờ hềt lơh sir sră nggal, ờ hềt geh ring bal tam gơl den mpồl tờm lơh gùng neh cò tơnring brê. Ci kụk gam pơgồp bal mờ ală anih lơh broă geh gơnoar nàng lùp khàu, lơh loh broă mus kơl brê tìs mờ adat boh lam: “Ci kụk geh kơnòl pơgồp bal bè mờng chài lơh broă nàng gròi sền tiah gơlik geh broă do, lòt sền tiah gơlik geh bơta mus kơl brê nàng bơsong di mờ jơnau cih, jat Adat Lâm nghiệp, jat ală Nghị định. Bơta do den ờ gam lơh glài mờ priă tai, rlau 5 sàu brê lơh sa neh gơ gơs tìs hìng sự bloh, mờ do là rlau 15 lồ brê kuơmàng”.

Chi brê gơtìp koh kơl nàng cò tơnring lơh gùng tàm brê dà lơgar Chư Yang Sin

Yal mờ cau cih ƀău anih jơnau đơs Việt Nam dê, dùl nă kwang đơng lam bồ Mpồl atbồ rơndap broă lơh 46 pà git, pa dờp kơnòl broă tàm mpồl nđờ nhai, tŭ do gam sền wơl broă gơlik geh nàng yal mờ Ƀộ Quôk phòng. Mpồl geh yal, hơ cau lơh ƀău in tơnơ̆ tŭ geh jơnau đơs bơh Ƀộ dê.

Ờ mìng cò tơnring brê dà lơgar Chư Yang Sin nàng lam lơh rơndap broă gùng Trường Sơn Đông, bơta mus kơl brê lơh gùng kung gơlik geh tàm brê dà lơgar Bidoup Núi Bà, càr Lâm Đồng. Tàm bơnah broă bơcri Đ42 mờ C13 bơh rơndap broă lơh dê, dùl gơl gùng jòng 2, 3 kơi sồ bal mờ uă bă brê jŏ nam neh gơtìp mus kơl jơh tơn.

Jat jơnau cih bơh adat boh lam dê, brê kuơmàng là phan kuơ dà lơgar geh sền gàr nền nòn; broă tam gơl jơnau kờñ ngui pal geh yal mờ Quôk hội, Cíñ phủ. Broă mpồl tờm lơh rơndap broă lơh gùng Trường Sơn Đông cò tơnring is brê, ờ mìng lơh tìs jơnau cih adat boh lam dê mờ gam lơh gơlik bơta ha pah dờng ngan ai bơta mus kơl brê mờ sơ gràm phan kuơ dơm chi tàm ală brê dà lơgar Chư Yang Sin mờ Bidoup Núi Bà.

Cau mblàng K’Duẩn