VOV4.K’ho- Drim ngai 07/02, lài mờ tŭ mŭt tàm ngai lơh broă bơh sơnrờp tơnơ̆ dơ̆ ơm rlô sa tềp bơhiàn dà lơgar Ñâm Zần, Phó Thủ tướng Thường trựk Cíñ phủ ồng Phạm Bình Minh bal mờ ală Phó Thủ tướng: Lê Minh Khái, Vũ Đức Đam, Lê Văn Thành neh tìp măt kwang bàng, kông cứk, viên cứk Cơldŭ lơh broă Cíñ phủ.

Đơs tàm dơ̆ tìp măt, di dơ̆ bồ sơnam pa, ala măt kwang đơng lam bồ Cíñ phủ, Phó Thủ tướng Thường trựk Cíñ phủ ồng Phạm Bình Minh jờng rơ ală cồng nha lơh geh mờ bơta tă pơgồp bơh Cơldŭ lơh broă Cíñ phủ dê gơwèt mờ ală kơnòl broă lơh broă bơh Cíñ phủ, Thủ tướng Cíñ phủ dê; gờm chờ nting bơr jơh ală kwang bàng, kông cứk, viên cứk, cau lơh broă nam pa bềng lìu bơta pràn kơldang, chờ hờp mờ pơn jăt tai lơh geh uă cồng nha rlau tai tàm ală broă lơh. Nam 2022 là nam dơ̆ 2 lam lơh jăt Broă rơndăp lơh bơtàu tơnguh lơh sa- mpồl bơtiàn tơngai bơh nam 2021- 2025 mờ Broă lơh Bơtàu tơnguh wơl mờ Bơtàu tơnguh lơh sa den tàng bơnah broă lơh uă, den tàng bè hơ̆ Phó Thủ tướng kơ̆p kờñ ală vụ, kụk, mpồl lơh broă mờ tơl nă kwang bàng, kông cứk, viên cứk, cau lơh broă bơh Cơldŭ lơh broă Cíñ phủ dê kŭp tê mŭt lơh broă niam jơh nùs tơn bơh ngai bồ sơnam pa.

Cau mblàng Lơ Mu K’Yến