Anih tờm Jăt sền, đơng lam tiah drà ngăc ngar càr Dăk Lăk (gam sơnđan là Dăk Lăk IOC) mŭt lơh broă bơh nhai 9 nam 2021. Tơnơ̆ 2 nam lơh broă, phan ngui Dăk Lăk tàm internet geh mờr 30 rơbô dơ̆ pờ ai mờ crăp. Anih yal tơngit http://tuongtaccongdan.daklak.gov.vn/ yal loh cồng nha bơsong neh dờp geh broă sền gròi bơh gal làng bol dê. Lŏ Trần Lệ, kis tàm sơnah ƀòn Thắng Lợi, ƀòn dờng Buôn Ma Thuột đơs bè bơta do: “Phần mềm do crăp ƀuơn, tŭ mŭt lơh broă ƀuơn sền. Bè bơta niam geh uă bơta ngan. Bè camera internet. Tŭ do neh lơh jăt sồ jơh ală cau gơtìp kal ke tŭ pờ lơh broă nggal bè broă lơh drơng ala dà lơgar, kơnờm mờ phần mềm do he gơtùi ngui internet ai sră nggal tus mờ ală mpồl lơh broă tàm internet geh dờp sră nggal mờ bơsong, mờ he git broă bơsong sră nggal mhar bè lơi. Làng bol pờ phan ngui do den gŏ geh kwơ ngan nàng jăt sền geh ală broă lơh bơh ală anih lơh broă”.

Ồng Võ Nguyễn Hoàng Nam, Phó Kwang atbồ drơng broă Anih tờm  IOC càr Dăk Lăk pà git, tus tŭ do, mpồl lơh broă do neh lơh gơs mờ ai ngui lơh broă rơlao 450 nơm camera ngăc ngar geh crăp uă tiah tàm ƀòn dờng Buôn Ma Thuột mờ ờ uă kơnhoàl, thị xã tàm càr. Jơnau yal geh tơrgùm bơh ală camera dê geh tơrbŏ bal tus tàm anih tờm jăt sền đơng lam tiah drà ngăc ngar càr dê. Bơdìh hơ̆ tai, kông nghệ măi mŏk ngăc ngar geh tơmŭt bal tàm phần mềm yal tơngit 1022 mờ 10 broă lơh drơng ala geh kwơ. Ală broă lơh drơng ala do lài ngan neh geh gơnoar là bơta tờm ai broă lơh geh dùl tiah drà ngăc ngar. Ồng Võ Nguyễn Hoàng Nam pà git: “Broă lơh drơng ala tiah drà ngăc ngar là anih geh tìp bal đah gơnoar atbồ mờ làng bol, nàng lơh bè lơi làng bol geh anih lơh broă bal mùl màl mờ gơnoar atbồ, tàm hơ̆ geh tơrgùm tàm broă yal ală jơnau dan jơnau đơs bơh làng bol dê, ală làng bol kờñ lùp bè bơta lơngăp lơngai mpồl bơtiàn, lơngăp lơngai tàm gùng lòt, tiah kis bè jơh ală bơta gơlik geh gùt dar mờ geh ală bơta ờ hềt di jăt mờ kơrnoăt geh ai den geh làng bol yal tus tàm anih IOC”.

Phan lơh broă do ngai sơlơ geh dờp uă jơnau yal bơh làng bol dê bơh tàm ală tiah pyoa tus. Bơh tŭ hơ̆, kwang đơng lam ală mpồl lơh broă neh iăt jơnau đơs bơh làng bol, mpồl lơh sa kă bro, jăt sền geh broă mờ broă bơsong broă, lam sồr ală bơnah broă lơh in. Ồng Trần Xuân Tiệp, Phó kwang atbồ Cơl dŭ lơh broă UɃÑZ kơnhoàl Cư̆ Mgar pà git: “Broă lơh broă bal đah gơnoar atbồ kơnhoàl mờ sở Thông tin truyền thông neh gơguh geh bơta niam. Geh ờ uă jơnau yal bơh làng bol pơyoa tus neh geh IOC yal tus mờ kơnhoàl mờ yal kơnhoàl in bơsong di tŭ”.

Jăt ồng Trương Hoài Anh, Kwang atbồ Sở Thông tin – Tuyền thông càr Dăk lăk yal, Anih tờm jăt sền đơng lam tiah drà ngăc ngar càr Dăk Lăk neh dong kờl tàm broă đơng lam mờ bơsong broă bơh ală anih lơh broă geh gơnoar niam, mhar, geh cồng nha. Mờ là anih tơrbŏ bal bơh broă lơh bal bàr đah tŭ làng bol gơtùi pơyoa jơnau đơs nàng pơgồp bal, yal ha là ai tơngŏ nàng ală anih lơh broă Dà lơgar in git bè ală bơta gơlik geh, broă gơrềng bal tus mờ bơta lơngăp lơngai tiah drà, gùng lòt, bơta lơngăp lơngai, phan bơna bơta chài càr dê. Nàng lơh gơs phan lơh broă do bơh tàm bơta tờm sồ tàm anih jăt sền, ồng Trương Hoài Anh pà git: “Lam sồr ală tiah geh tơl bơta niam geh rơhờo bơcri priă nàng geh anih IOC is bơh ală tiah dê nàng geh bal mờ IOC càr dê lơh bè lơi nàng di pal mờ jơnau kờñ đơng lam, lam sồr kung bè broă tus bal atbồ dà lơgar bơh làng bol bal mờ mpồl lơh sa kă bro tàm càr dê”.