VOV4.K’ho- Broă lơh “Pơgồp bal hìu bơnhă kông ñân cau Yoan mờ hìu bơnhă làng bol kòn cau dùl ết nă cau tàm ù tiah do dê” bơh Ƀiñ đoàn 15 lam lơh jat neh cèng wơl ală cồng nha geh ngan. Bơh broă lơh lơh oh mi bal, ală hìu bơnhă kông ñân cau Yoan neh dong kờl làng bol kòn cau dùl ết nă cau tàm càr Gia Lai tam gơl bơta gĭt wă tàm broă bơtàu tơnguh lơh sa, tơn jơh jơgloh, tơrmù rƀah, pơgồp bơnah sơlơ tơnguh mpồl tam klăc dờng jơh gùt làng bol.

Bi Nguyễn Thị Kim Thanh, Đội 4, Kông ty Bình Dương, Ƀiñ đoàn 15 là 1 tàm ală hìu bơnhă lam lài lơh jat srơh “Pơgồp bal hìu bơnhă kông ñân cau Yoan mờ hìu bơnhă làng bol dùl ết nă cau tàm tiah do dê”. Bi Thanh dờp dong kờl hìu bơnhă bi Kpuih  Bler, kòn cau Jrai lơh bal tàm kông ty, ơm tàm xã Ia Tô, kơnhoàl Chư Prông, càr Gia Lai. Lài do, hìu bi Kpuih  Bler là hìu bơnhă rƀah, ù tiah lơh sa geh mơya ndrờm lời gời, mìng tam dùl ết kòi mờ tơngời. Den tàng bulah ùr bơklau bi dê lơh broă bòl glar kal ke gùt nam kung gam ờ tơl phan sa, phan soh. Bơh tŭ geh bơta dong kờl, bơto pơlam jơh nùs ngan bơh bi Thanh dê, rài kis bơh hìu bơnhă bi Kpuih Bler dê neh gơguh uă rlau. Tus tŭ do, hìu bơnhă bi Kpuih Bler geh rlau 3 lồ điều, kơphê, lơh geh priă jền sùm. Hìu bơnhă ờ mìng tơl sa tơl ngui mờ gam jơngkah tềm pềr tai sơl. Bi Kpuih Bler, Đội 4, Kông Ty Bình Dương, Ƀiñ đoàn 15 đơs: Pah tŭ kòp jê kơnờm geh ală oh mi dong kờl, sơlơ̆u wơl den geh oh mi ndai kòp jê den kung dong kờl wơl sơl. Đơs bal là oh mi kis bal mờ gơ̆p jơm glòm bal, dong kờl bal.

Bi Nguyễn Thị Kim Thanh (ào tơlir) mờ bi Kpuih Bler - Đội 4, kông ty Bình Dương, Ƀiñ đoàn 15 dong kờl bal mờ gơ̆p bơta chài tam phan bơtàu tơnguh lơh sa

Ai gơwèt mờ bi Nguyễn Thị Kim Thanh, tàm Đội 4, Kông ty Bình Dương, Ƀiñ đoan 15 den đơs là, broă dong kờl bi Kpuih Bler là bơta chờ hờp bơh añ dê. Bi Thanh đơs là, tŭ pa tus xã Ia Tô ơm kis mờ lơh broă, rài kis bơh hìu bơnhă bi dê kung gơtìp uă ngan kal ke, tài kơnờm bơh bơta dong kờl, jơm glòm bal bơh làng bol dê, hìu bơnhă bi Thanh hơ̆ sồng geh rài kis bè tŭ do. Den tàng, broă dong kờl làng bol đơs bal mờ bi Kpuih Bler kung là broă nùs nhơm lơm. Bi Nguyễn Thị Kim Thanh: Bơto pơlam bal mờ gơ̆p ală broă lơh ntê, lơh cồng gơcăt, tuh dà mbè lơi ai gơ in niam, bơto pơlam ròng phan, tam biăp sàng goh, lơh sa hìu bơnhă. Ai bal mờ gơ̆p in bơta nùs nhơm, ờ mìng là bè lơh sa lơm mờ gam geh nùs nhơm tai, tŭ kòp jê, tŭ gơtìp jơnau ờ niam, añ kung geh tiah kơldìng tàm hìu bơnhă bi Bler dê.

Srơh “Pơgồp bal đah hìu bơnhă kông ñân cau Yoan mờ hìu bơnhă kông ñân làng bol kòn cau dùl ết nă cau” geh Ƀiñ đoàn 15 lam lơh bơh nam 2006. Bơh 30 yô hìu bơnhă bơh sơn rờp, tus tŭ do, mpồl neh rề ơnàng gơguh rlau 4 rơbô yô hìu bơnhă, tàm hơ̆ geh pơgap 2 rơbô yô hìu bơnhă làng bol kòn cau dùl ết nă cau. Broă pơgồp bal hìu bơnhă neh lơh geh bơta rềp mềl, gĭt wă bal mờ gơ̆p mờ rcang tam pà bal, dong kờl bal tàm ală tŭ gơtìp kal ke, bal mờ gơ̆p bơtàu tơnguh lơh sa hìu bơnhă.

 Ală yô hìu bơnhă tàm pơgồp bal neh tơngŏ loh làng ai broă lơh hòi jà làng bol geh cồng nha, geh kwơ ngan bơh Ƀiñ đoàn 15 dê. Bơh hơ̆, bơta tam klăc bal đah cau lơh broă tàm mpồl lơh broă bal; đah kông ñân mờ làng bol tàm ƀòn lơgar ngai sơlơ đềt rềr, tam klăc bal. Thượng tá Khuất Bá Cao- Ƀí Thư Đảng ủỷ Ƀiñ đoàn 15 pà gĭt: Bơh broă lơh jat broă pơgồp bal hìu bơnhă, tàm ală nam pa do tă pơgồp kwơ màng ngan tàm broă lơh kơ̆ kơljap mờ bơtàu tơnguh bơh mpồl dê. Mơkung pơgồp bơnah bal mờ kấp ủy, gơnoar atbồ ală tiah, ală mpồl tàm ù tiah do dê sền gàr kơ̆ kơljap bơta lơngap lơngai cíñ trị, rơndap tap sèng, ờdo ờdă mpồl bơtiàn mờ sền gàr bơta lơngap lơngai ƀòn lơgar. Ală hìu bơnhă làng bol kòn cau dùl ết nă cau ờ mìng lik klàs rƀah mờ gam brồ guh lơh pas, geh uă yô hìu bơnhă tus tŭ do priă lơh geh hìu bơnhă dê geh bơh 200 tus 300 tơlak đong tàm dùl nam.

Cồng nha bơh broă lơh “Pơgồp bal hìu bơnhă” dong kờl bal mờ gơ̆p bơtàu tơnguh lơh sa bơh Ƀiñ đoàn 15 dê neh lơh geh ală bơta niam bè lơh sa, niam chài, mpồl bơtiàn, sền gàr dà lơgar- sền gàr bơta lơngap lơngai. Bơh hơ̆, lơh geh bơta pin dờn, kờñ gơboh, tàm klăc bal đah kấp ủy, gơnoar atbồ mờ làng bol tàm tiah do.

Cau cih Hoàng Qui- Cau mblàng K’Hạnh