VOV4.K’ho - Là dùl kông ty gơwèt Tổng Kông ty pơ-àr Việt Nam, Kông ty TNHH MTV Chi lơh pơ-àr đah jum sơn đờm tam brê tàm càr Kon Tum bơh nam 2001. Neh rơlao 21 nam mờ uă bơta kal ke, glar bòl, bơta lòng tus tŭ do kông ty neh geh kờp jơh bă ù geh mờr 8 rơbô 200 lồ, tàm hơ̆ rơlao 7 rơbô 400 lồ geh dờp bơh broă tơm priă sền gàr tiah kis brê. Mùl màl pà gŏ, khà priă geh bơh broă tơm priă sền gàr tiah kis brê neh dong kờl Kông ty TNHH MTV Chi lơh pơ-àr đah jum lơh jăk rơlao broă atbồ sền gàr mờ tơnguh bơtàu brê bơh kông ty dê.

Kờp tus nhai 09 nam 2022, kờp jơh bă brê tam bơh Kông ty TNHH MTV Chi lơh pơ-àr đah jum tàm càr Kon Tum là mờr 8 rơbô 200 lồ. Brê tam bơh kông ty dê ờ tơrgùm mờ geh rah rài, tàm pà bal tàm 33 xã, thị trấn gơwèt 8 kơnhoàl, mìng là tàm tiah ngài, tiah kal ke càr Kon Tum dê. Bi Nguyễn Đình Hùng, cau geh 12 nam kis mờ broă atbồ sền gàr mờ tơnguh bơtàu brê bơh Kông ty TNHH MTV Chi lơh pơ-àr đah jum dê pà git, broă lơh mờ brê den geh lơh sùm gùt nam, glar bòl mơya bi sùm gơboh mờ broă lơh do: “Broă lơh añ dê den geh pah ngai, pah poh den lòt sền gròi atbồ sền gàr hơ̆ sồng kơrian di tŭ ală broă gơtìp tàm brê, bè mus kơl aniai tờm chi hơ̆ sồng sơgràm ù, lam sồr sền gàr ù brê bơh Kông ty dê. Tàm kàl mìu lòt sền ală broă bè koh rơha, còr bơsơ̆t nho, gam bè broă lơh tàm kàl prang den mìng lòt sền nàng rơcang sơndră mờ ồs sa, gŏ di tŭ bañ lời gơtìp ồs sa brê”.

Neh geh ală tŭ Kông ty TNHH MTV Chi lơh pơ-àr đah jum gơtìp tàm bơta kal ke ờ gơtùi bơsong. Mùl màl bè nam 2005, tài ờ geh priă nàng sơnka sền gàr, mus pès jăt gah brê bơh kông ty dê, den tàng sùm gơtìp ồs sa tàm kàl prang. Pah dơ̆ ồs sa gơtìp git nđờ jơ̆t lồ, geh tŭ là git nđờ rơhiang lồ brê bơh kông ty dê gơtìp ồs sa. Hơ̆ sồng tus tàm nam 2014, brê nho bơh kông ty dê neh tus tŭ pal tơnhào, mơya ờ gơtùi tăc den tàng pal dan mờ Cíñ phủ tam gơl jơnau kờñ kă bro bơh broă tam chi lơh pơ-àr tus mờ broă tam chi ai dơm chi dờng... Bơtoah ngan là bơta kal ke do neh geh bơsong.

Neh 21 nam lơh broă lơh brê bơnơm dê bơh ală tŭ ngai pa geh crơng gơs Kông ty dê, bi Hoàng Văn Toàn, Phó Kwang atbồ Mpồl tam brê lơh pơ-àr Ngọc Hồi pà git, ală bơta glar bòl tŭ do neh gơs bơta lời kir niam, bè broă tam nho tàm dòr Sạc ly, do là tiah neh geh tŭ là ù tiah chơ̆t, tài sơnơm khih ling lơgar Mỹ-nguỵ ƀồm rơsìh tàm rài tam lơh lài do: “Tŭ sơn đờm tus tam den đơs ngan jơh dùl dòr ndrờm mìng geh ja mờ nsàng ƀồm, mềm tàm hơ̆ uă ngan, tŭ sơn đờm guh tàm hơ̆ den ngòt ngan. Mơya tus tŭ do, gŏ chi brê neh hòn gơs niam den chờ hờp ngan, mờ he kung ờ kơlôi là gơs brê bè ne. Ală nam pa do den ƀuơn rơlao tài geh gùng lòt, chi brê kung neh dờng den tàng ală nam pa do ờ hoan kal ke rơlao mờ ală nam sơnrờp geh tam”.

Ƀuơn rơlao, bơh tŭ geh broă tơm priă sền gàr tiah kis brê, rơlao 7 rơbô 400 lồ brê bơh Kông ty TNHH MTV Chi lơh pơ-àr đah jum gơwèt mpồl geh tơm priă lơh drơng ala. Pah nam Kông ty geh tai dùl khà priă niam nàng tơm priă ai broă atbồ, sền gàr mờ tơnguh bơtàu brê in. Nam 2021, kông ty geh Kes priă Sền gàr mờ tơnguh bơtàu brê càr Kon Tum tơm geh mờr 6 tơmàn đong priă sền gàr tiah kis brê. Nam 2022 kờp tus nhai 8 pa do khà priă sền gàr tiah kis brê mờ kông ty neh dờp geh là rơlao 4 tơmàn 799 tơlăk đong. Tŭ do, tàm mờr 8 rơbô 200 lồ brê, mìng là brê nho pe nha tàm 33 xã, thị trấn gơwèt 8 kơnhoàl tiah ngài, tiah kal ke càr Kon Tum dê geh Kông ty TNHH MTV Chi lơh pơ-àr đah jum atbồ sền gàr niam. Ồng Trần Sỹ Hải, Củ tịc UɃÑZ xã Đăk Kan, kơnhoàl Ngọc Hồi pà git, tàm xã do geh 1 rơbô 200 lồ brê bơh Mpồl tam brê lơh pơ-àr Ngọc Hồi, gơwèt Kông ty TNHH MTV Chi lơh pơ-àr đah jum. Ồng Hải đơs niam broă pơgồp bal atbồ, sền gàr brê mờ tus bal lơh broă rài kis lơh broă sa mpồl bơtiàn kông ty dê: “Xã mờ Mpồl tam brê kung yal bal mờ geh cri bơyai bal sùm. Geh broă lơi pơnrơ ha là gơlik geh pin pơrdah ală cau krơi mŭt tàm xã den Mpồl tam brê kung yal mờ xã nàng xã ai mpồl kwang àng, xã đội pơgồp bal lòt sền lơh jăt kơnòl. Bơdìh hơ̆ tai, Mpồl tam brê kung sùm lơh broă rài kis lơh broă sa mpồl bơtiàn tàm xã, pà sră cih ai kơnòm bơsram geh rài kis gơtìp kal ke, tus bal dong kờl lơh hìu pa pà cau rơƀah tàm xã in. Mpồl tam brê kung tus pơgồp bal mờ xã nàng ai tơl bơta niam ală hìu làng bol in tus bal tàm broă sền gàr brê. Gơwèt mờ uă brê ƀạc đàn pa tam nam sơnrờp, nam dơ̆ bàr ai tơl bơta niam nàng geh dong kờl làng bol in yòng ù hơ̆ nàng tam bơrlŭ bal bùm blàng nàng tơnguh bơtàu lơh sa”.

Ală nam pa do mờ khà priă geh pah nam bơh broă lơh sa kă bro mờ broă tơm priă sền gàr tiah kis brê, Kông ty TNHH MTV Chi lơh pơ-àr đah jum neh geh lơh broă niam sùm tàm 8 Mpồl tam brê. Bal mờ hơ̆, ring niam tàm rài kis, broă lơh, rơhời tơnguh priă geh ai 142 nă kwang bàng, ñân viên mờ cau lơh broă. Ờ mìng bè hơ̆, tàm nam 2021 Kông ty neh tam pa geh 200 lồ brê mờ tàm nam 2022 là 170 lồ brê.

Cau cih Khoa Điềm- Cau mblàng Ndong Brawl