Trung tá Vương Văn Khoa, Kwang atbồ Kwang àng xã Dăk Som, kơnhoàl Dăk Glong, pà gĭt, bơh khà priă mpồl bơtiàn lơh bal, xã neh crăp geh 11 nơm camera sền gàr lơngap lơngai tàm tiah tờm, ală sơnĕ tàm gùng, anih plung ơm tiah nhơl chờ Tà Đùng. Ală Camera geh tàm tơrbŏ tơn mờ kwang àng xã, Ủy ƀan Ñân zân xã, Kwang àng mờ kwang atbồ thôn, ƀòn nàng jat sền, sền gròi ală bơta lơngap lơngai, rơndap tap sèng. Camera sền gàr lơngap lơngai neh pơgồp bơnah uă ngan tàm broă rcang sơndră cau lơh tìs, sền gàr lơngap lơngai, rơndap tap sèng tàm ù tiah do dê.

Bơh broă sền wơl tàm camera, mpồl kwang àng xã neh pơgồp bal lòt jòi mờ jun ồng neh 73 sơnam ơm tàm xã Quảng Khê gơtìp bồ tơngoh ờ kah tai hŭi gùng rê mờ geh mpồl kwang àng jòi gŏ jun rê lơngap lơngai. Bơh cồng nha geh ngan, Kwang àng xã Dăk Som gam pơn jat tai rề ơnàng lơh uă broă lơh crăp camera sền gàr lơngap lơngai tus jơh ală tiah làng bol ơm kis.

Trung tá Vương Văn Khoa, đơs: Bơh tŭ kwang àng xã lam lơh crăp camera den ală dơ̆ broă gơlik geh tàm ù tiah xã dê neh gơmù loh làng ngan. Kung bơh camera do mờ bol añ sền gŏ dùl nă ồng dờng sơnam hŭi gùng rê bơh Quảng Khê mŭt tàm do.

Kung ndrờm bè xã Dăk Som, tus tŭ do, kwang àng xã Quảng Khê, kơnhoàl Dăk Glong, neh crăp geh 19 nơm camera sền gàr lơngap lơngai tàm ală gơl gùng tờm, tiah làng bol ơm is uă. Thiếu tá Phạm Ngũ Lạng, Kwang atbồ Kwang àng xã Quảng Khê pà gĭt, xã gam pơn jat tai hòi jà tă pơgồp priă jền nàng crăp tai 13 nơm camera, di mờ jơnau kờñ atbồ ù tiah tờm kơnhoàl dê. Thiếu tá Phạm Ngũ Lạng, đơs:

Nhai 10/2022 bol añ lam lơh mpồl bơtiàn lơh bal crăp ală camera sền gàr lơngap lơngai, den bơh hơ̆ tus tŭ do tàm ù tiah do dê ờ gơlik geh broă lơh tìs lơi, ală cau lơh tìs bè lơh roh bơta rơndap tap sèng, bè cau pơnu tàm trồ mang sùm ơm nggui nhơl trồ mang tàm ală tiah mpồl bơtiàn neh gơmù. Mờ sền gròi ngan là broă ală kơnòm bơsram tus bal lòt rê tàm gùng mờ ờ ndau sơgơn sền gàr bồ, đì rơndeh ntoăt rat, pờ nggồr dờng... den kung ờ gam geh bè lài tai.

Ală camera sền gàr lơngap lơngai geh cồng nha ờ mìng dong mpồl lơh broă geh gơnoar in gàr niam lơngap lơngai, rơndap tap sèng lơm mờ gam pơgồp bơnah tam gơl bơta mờng kuèng, bơta gĭt wă bơh làng bol tiah sar lơgar ngài Dăk Glong dê tàm broă lơh jat jơnau sồr adat boh lam, ngan là tŭ tus bal lòt rê tàm gùng. Cồng nha loh làng ngan rlau jơh là bè ờs wơl bơta lơngap lơngai, rơndap tap sèng tàm tiah do nàng làng bol in iang nùs lơh broă sa. Ồng Trần Đình Hưng, ơm tàm thôn 1, xã Dak Som, kơnhoàl Dăk Glong, chờ hờp đơs: Tàm do den bơta sền gàr lơngap lơngai niam ngan, jŏ jŏ geh dơ̆ kơñau so lơm. Mơya bơh tŭ geh crăp camera sền gàr lơngap lơngai den añ kung sền gŏ là ờ hoan geh  tai.

Jat Kwang àng kơnhoàl Dăk Glong, tus tŭ do broă lơh crăp camera sền gàr lơngap lơngai neh geh lam lơh tàm jơh 7 xã tàm kơnhoàl dê, mờ rlau 100 tiah. Thượng tá Nguyễn Xuân Hùng, Kwang atbồ kwang àng kơnhoàl Dăk Glong pà gĭt, mờ ală bơta kwơ geh ngan, kwang àng kơnhoàl gam pơn jat tai hòi jà ală bơta tă pơgồp bal tàm mpồl bơtiàn nàng pơn jat tai crăp camera tàm uă tiah. Thượng tá Nguyễn Xuân Hùng đơs: Bol añ sền gŏ loh làng cồng nha tàm broă rcang sơndră cau lơh tìs kung bè bơt bơtàu ală broă lơh, ală srơh jơh gùt làng bol tus bal sền gàr lơngap lơngai Dà lơgar. Bulah là dùl kơnhoàl rƀah mơya mờ nùs nhơm lơh ngan, kwang bàng kơnhoàl sồr kwang àng ală xã pơgồp bal mờ gơnoar atbồ tiah do dê lơh jat gùng dà broă mpồl bơtiàn lơh bal nàng lơh broă lơh crăp camera sền gàr lơngap lơngai tàm jơh gùt kơnhoàl.

Tàm tiah sar lơgar ngài  Dăk Glong, ù tiah dờng ơnàng, làng bol ờ hoan geh, broă lơh crăp camera sền gàr lơngap lơngai geh sền bè là “tồr măt” bơh mpồl kwang àng dê, neh mờ gam lơh niam geh cồng nha tàm broă lơh rcang sơndră, tam dră mờ ală cau lơh tìs, gàr niam lơngap lơngai, rơndap tap sèng... Mờ broă lơh do kung ngui niam geh bơta pràn bơh jơh gùt làng bol dê tàm broă tus bal srơh jơh gùt làng bol sền gàr lơngap lơngai sền gàr Dà lơgar.