VOV4.K’ho - Ală nam do, geh ờ uă hìu làng bol kis tàm kơnhoàl Chư Sê, càr Gia Lai neh bơcri priă, lơh hìu ròng sềm bar bèt mờ kơ̆p kờñ geh jòi gùng dà pa tàm broă tơnguh bơtàu lơh sa. Mờ khà priă tăc rơsòn sềm bar bèt sùm tàm bơta kas mờ anih tăc geh ring niam, uă hìu ròng sềm bar bèt geh uă priă bơh 2, 3 rơhiang tus git nđờ tơmàn đong pah nam.

                               Dùl hìu ròng sềm bar bèt tàm kơnhoàl Chư Sê, càr Gia Lai

Ồng Phạm Tiến Dũng là cau lam lài ngan tàm broă ròng sềm bar bèt tàm kơnhoàl Chư Sê. Ồng pà git, nam 2014, tŭ 8 lồ ù tam tiêu hìu nhă ồng gơtìp chơ̆t tài kòp, ồng jòi gùng dà lơh sa pa. Gŏ kơnhoàl Chư Sê geh uă bơta niam nàng ròng sềm bar bèt, ồng bơcri priă lơh mờ neh geh cồng nha: “Nhai 10 nam 2014, añ lơh hìu ơnàng 90 thơ̆k vuông, rơlao 7 nam den khà geh bơh hìu ơnàng 90 thơ̆k vuông ai rơlao 20 kĭ tàm 1 nhai. Tŭ do, kờp jơh bă tiah ơnàng ròng sềm bar bèt rơlao 1 sào gùt dar hìu. Priă geh mìng bơh hìu sơnrờp mờ hìu dơ̆ bàr, hìu dơ̆ bàr là geh 300 thơ̆k ơnàng, geh bơh 7 tus 8 kĭ tàm 1 nhai. Lơh sa mờ sềm bar bèt den pal geh tơngai uă, di lah nam sơnrờp, dơ̆ bàr, dơ̆ pe den geh ờ uă, ờ ndrờm mờ nam dơ̆ 4, dơ̆ 5. Bồ nam 2022, khà priă rơsòn sềm bar bèt gơguh ni sơna, geh tus 24, 25 tơlăk đong tàm 1 kĭ”.

Kung ndrờm bè hơ̆ sơl, hìu ồng Lã Văn Phóng, kis tàm thị trấn Chư Sê kung geh priă sơl bơh broă ròng sềm bar bèt. Nam 2016, ồng bơcri priă rơlao 300 tơlăk đong nàng lơh hìu ròng sềm bar bèt, mờ mpàn lơh la phong, phan ntas nàng pơn dờm, măi lơh ram mờ bơta duh nàng sềm bar bèt jòi ơm. Tơnơ̆ mờ 6 nam ròng, tŭ do pah nhai ồng Phóng geh rơlao 100 tơlăk đong bơh broă tơnhào rơsòn sềm bar bèt. “Tàm tŭ añ lơh den añ tus tàm tiah Ayun Pa lơh broă mờ Kông ty yến sào Khánh Hoà, tài tŭ hơ̆ añ kờñ ròng sềm bar bèt. Rê añ tơrlòng lơh lài ngan là 120 thơ̆k ơnàng, neh geh 6 nam, nam pa do kung geh bơh 50 tus 60 kĭ. Añ roh priă bơcri lài ngan, tơnơ̆ mờ hơ̆ là mìng geh priă, 1 nhai jơh bơh 200 tus 300 rơbô priă dà ồs đèng. Broă ròng sềm bar bèt kung ndrờm mờ broă tam tòm tiêu, kơphe sơl, tơnơ̆ mờ 3 nam là geh priă”.

                    Rơsòn sềm bar bèt geh làng bol kis tàm kơnhoàl Chư Sê tơnhào mờ khà uă

Tŭ do, tàm kơnhoàl Chư Sê neh geh mờr 230 hìu ròng sềm bar bèt, khà geh di pơgăp 50 kĭ rơsòn tàm 1 nhai. Mờ khà priă tàm drà kă bro geh bơh 20 tus 24 tơlăk đong tàm 1 kĭ, priă geh tơl hìu ròng sềm bar bèt geh bơh 20 tus 70 tơlăk đong tàm 1 nhai, geh tŭ geh hìu tus 200, 300 tơlăk đong. Ồng Nguyễn Văn Hợp, Kwang atbồ Phòng Nông nghiệp mờ Phát triển Nông thôn kơnhoàl Chư Sê pà git: broă ròng sềm bar bèt lài ngan neh cèng geh cồng nha uă mờ ring niam tàm broă lơh sa. Phòng neh geh ală jơnau bơto sồr ală hìu làng bol bè ală sră nggal adăt boh lam, kơrnoăt bè bè tiah ròng sềm bar bèt nàng gàr kloh niam tiah kis, lơngañ mờ kloh niam ờ do ờ dă phan sa. “Bè broă lơh tờm den anih lơh broă kung bơto sồr ală hìu lài jơh pal lơh ală sră nggal gơrềng tus mờ broă lơh sră ai kă bro, dan geh anih tơl bơta kloh niam ờ do ờ dă phan sa tàm broă lơh nàng gàr niam rơsòn sềm geh lơh gơs, geh bơta kwơ niam ngan ai cau ngui sa in. Bè jŏ jòng geh bơto sồr ală hìu lơh gơs ală sră nggal nàng tus bal mờ phan lơh OCOP kơnhoàl dê, wèt tus broă bơ̆t bơtàu khà măt kă bro yến sào kơnhoàl Chư Sê dê”.

Bơdìh hơ̆ tai, nàng atbồ ală hìu ròng sềm bar bèt, Phòng Nông nghiệp mờ Phát triển Nông thôn kơnhoàl Chư Sê neh sồr jơh ală hìu pal lơh sră mờ gơnoar atbồ ƀòn lơgar bè broă pơn dờm, ròng sềm bar bèt kung bè broă bơcri priă lơh hìu ròng. Mờ sồr ală hìu pal sền gròi sùm bơta pràn kơl dang să jan sềm bar bèt, lơh jăt broă kloh niam hìu ròng, phan lơh broă, tơrgùm niam siồ siă di jăt mờ kơrnoăt neh geh ai. Bơdìh hơ̆ tai, nàng tơmù lơngañ bơh phan pơn dờn sềm, gah lơh broă geh gơnoar sồr ală hìu ròng pal lơh jăt nền nòn kơrnoăt ờ pờ lơs tàm tơngai bơh 6 jơ drim tus 9 jơ mang mờ ờ ngui phan lơh ntas nàng pơn dờm sềm bar bèt tàm tơngai bơh 9 jơ mang tus 6 jơ drim ngai tơnơ̆. Phòng Nông nghiệp mờ Phát triển Nông thôn pơgồp bal mờ Anih tờm broă lơh drơng ala lơh sa suơn sre kơnhoàl mờ UɃÑZ ală xã, thị trấn bal mờ ală anih lơh broă, mpồl lơh broă tờm tàm kơnhoàl sùm sền gròi broă lơh jăt ală kơrnoăt bè săp ntas, tiah kis mờ rơcang sơndră mờ kòp gơtờp bơh ală hìu ròng sềm bar bèt dê.

Ờ mìng tàm kơnhoàl Chư Sê, tàm tiah đah jum măt tơngai lik càr Gia Lai kung neh gơs tiah ròng sềm bar bèt tơnguh bơtàu ngan. Tàm hơ̆, thị xã Ayun Pa neh geh gĭt nđờ rơhiang hìu ròng sềm bar bèt. Cồng nha broă lơh sa geh uă bơh broă ròng sềm bar bèt neh “pơrlai” nùs nhơm kờñ lơh pas bơh làng bol kis tàm kơnhoàl Ayun Pa dê. Nàng broă ròng sềm bar bèt tơnguh bơtàu kơl jăp pơgồp bal mờ broă sền gàr tiah kis, HĐÑZ càr Gia Lai neh tơlik Nghị quyết: Tàm tơngai 5 nam bơh nam 2020, ală hìu ròng sềm bar bèt tàm tiah dơlam bơh ƀòn dờng, thị xã, thị trấn, ƀòn ơm kis pal tơn jơh lơh broă ha là ntrờn tus tàm tiah geh ai ròng.

Cau mblàng Ndong Brawl