Lơh jat tơngume lơh broă nam 2023 bơh gah ồs đèng Việt Nam dê bè “Lơh jat ngan ngồn tềm pềr- Rơcang sơndră pơhì pơhà”, Kông ty ồs đèng Dăk Lăk neh tơrgùm ring bal ală broă lơh tàm 5 gah tờm, geh: lơh sa kă bro; bơcri priă lơh; atbồ, ngui phan bơna; atbồ, ngui phan kuơ geh is mờ sền gàr tiah ơm kis; atbồ, ngui cau lơh broă mờ tŭ tơngai lơh broă. Jat hơ̆, Kông ty neh lam lơh pràn ngan broă atbồ mờ tơrmù ƀà hoàc huơr ồs đèng, sơlơ tơnguh broă lơh sền sơ wì kloh niam trạm ƀiến áp, lơh niam wơl măi đo kờp ồs đèng, pờ tơlik ồs đèng gùng kềng, pơn đơl pràn lơh ngan tơrmù khà hoàc huơr ồs đèng nam 2023 gơmù hơ đơm 4,6%.

Tàm broă lơh kă bro, tus tŭ do, jơh ală nac ngui đèng tàm Dăk Lăk neh geh ala kông tơ điện tử; mờ kung lam lơh tam gơl sồ, loh làng broă đo kờp khà ngui ồs đèng pah ngai, lam lơh jat kơrnuat “dùl mpồng tơrbŏ bal” đah gah ồs đèng mờ anih atbồ dà lơgar, dong làng bol ƀuơn ngui ală broă drơng ala bè ồs đèng.