Tus bal geh ala măt Mpồl rơndăp ù tiah bơtàu tơnguh tiah drà, Mpồl kiến trúk sư Việt Nam bal mờ uă cau chài tàm lơgar mờ dunia tus bal. Jăt mờ hơ̆, broă geh ai lơh, tiah nhàr bal mờ bơta anàng ù tiah kơlôi sơnơng geh jơh ù tiah ƀòn dờng Dà Làc mờ ală kơnhoàl Lạc Dương, Đơn Dương, Đức Trọng bal mờ dùl bơnah ù tiah kơnhoàl Lâm Hà, rề anàng ù tiah jăt broă lơh bơh bơta ñhoa 850 thơ̆k rơlao hờ đang pơn drờm mờ măt dà lềng dê; bă anàng tus 336 rơbô lồ, anàng rơlao mờr 10 dơ̆ mờ bă ù ƀòn dờng Dà Làc tŭ do.

Jăt Kiến trúk sư Trần Ngọc Chính, Củ tịc Mpồl rơndăp ù tiah bơtàu tơnguh tiah drà Việt Nam đơs, nàng prăp gàr bơta niam chài krơi is Dà Làc dê jăt mờ tơngai, wèt tus jơnau kờñ gơguh tơlir niam mờ sơndră mờ tam gơl nhơm trồ tiah, kờñ ngan geh dùl gùng dà broă lơh jŏ jòng, ală gùng dà broă lơh krơi is pa lơh geh cồng nha jơnau kờñ rơndăp ù tiah bal ƀòn dờng Dà Làc mờ tiah rềp bal tus nam 2045 tơnơ̆ mờ tŭ geh Thủ tướng Cíñ phủ kĭ ring bal.