Tàm Dơ̆ cri bơyai lơh sa kấp Phó Thủ tướng đah lơgar Việt Nam mờ lơgar Hàn Quốk dơ̆ bàr pa bơyai lơh tàm Hà Nội, geh Phó Thủ tướng Cíñ phủ ồng Lê Minh Khái mờ Phó Thủ tướng lơgar Hàn Quốk ồng Kyungho Choo đơng lam bal, bàr gah neh ring bal tơnguh broă lơh broă bal bơcri priă-kă bro đah bàr lơgar tàm tơngai tus.

Tŭ do, lơgar Hàn Quốk pơn jăt tai geh sùm khà uă ngan bè broă bơcri priă tơn (kờp jơh priă dan cih măt bơcri geh 81 tơmàn 300 tơlăk dolar Mỹ); ơm dơ̆ bàr bè lơh broă bal tơnguh bơtàu (3 tơmàn 750 tơlăk dolar Mỹ), nhơl chờ mờ lơh broă; ơm dơ̆ pe bè lơh broă bal kă bro (geh 86 tơmàn 400 tơlăk dolar Mỹ tàm nam 2022). Bàr lơgar ring bal tơnguh lơh broă bal geh cồng nha tàm gah dong kờl tơnguh bơtàu mùl màl đah Cíñ phủ lơgar Hàn Quốk mờ Cíñ phủ lơgar Việt Nam bơh broă ngui geh cồng nha ală rơndăp broă dong kờl ờ tơm wơl, ngui priă ODA lơgar Hàn Quốk bơh kes priă EDCF mờ Kes priă EDPF.