VOV4.K’ho- Lồi nhai 8 pa do, Mpồl tam klăc Ơruh pơnu Việt Nam càr Dăk Lăk bơyai lơh cribơyai Bơta kơ̆p kờñ ơruh pơnu dê. Tàm dơ̆ cribơyai, ală đoàn viên, ơruh pơnu neh song dơ pă cribơyai uă broă geh gơrềng tus sơnđờm mut lơh broă, lơh broă mờ ală tơngume geh gơrềng nàng bơtàu tơnguh mpồl đoàn, tam klăc bal, tơrgùm ơruh pơnu.

Tàm cribơyai, ală đoàn viên ơruh pơnu neh cribơyai uă tơngume bè: tam pà bal ală broă niam, broă lơh geh cồng nha, bơceh pa bơh ơruh pơnu tàm tơl tiah dê, mpồl lơh broă pơgồp bơnah gờm chờ lơh geh cồng nha Pơrjum dờng Đoàn ală kấp. Đơs bè bơta sền gĭt mờ tơngŏ jơnau kơ̆p kờñ, bơta kơ̆p gơn bơh ơruh pơnu dê lài, tàm tŭ mờ tơnơ̆ dơ̆ pơrjum dờng Đoàn gùt càr mờ jơh gùt lơgar dơ̆ 12, tơngai lơh broă bơh nam 2022-2027. Đơs tus jơnau kơlôi sơnơng is să tờm dê bè kơnòl, kơnòl pal lơh bơh ơruh pơnu dê tàm tơngai pa.

Ală cau ala mat song dơ pă đơs: tàm tơngai pa do, broă bơtàu tơnguh mpồl đoàn, hội tàm ală tiah neh geh sền gròi, mpồl đoàn neh tơngŏ gơnoar broă tàm ală broă lơh, srơh tàm ală tiah dê, tơngŏ bơta lam lài, tus bal dong kờl is bơh rơnàng kơnòm să dê. Mơya, tàm bàr pe tiah làng bol ơm kis, broă tam klăc, tơrgùm ơruh pơnu kung gam ờ hềt pràn, broă lơh đoàn gam rah rài, ờ hềt lơh geh cồng nha gơ hòi gơ jà, tơrgùm ơruh pơnu tus bal.

Ală cau tus bal cribơyai tàm dơ̆ pơrjum

Bi Nguyễn Văn Thành, ơm tàm thôn 7, xã Ea Kiết, kơnhoàl Cư Mgar đơs jơnau pơn yơu geh ngan: Ală đoàn viên ơruh pơnu tàm thôn sơnam mờ dờng den gơ lơh bè là ờ gam tus bal tai, ai tàm sơnam mờ gam lòt bơsram den geh bàr pe nă oh tus bal mơya mờ he hòi jà kal ke ngan. Tŭ do, hòi jà ală oh den bơh loa anih pờ tơlik jơnau đơs halà Facebook, den he tus tơm bơh bơr tơn mờ ală oh den ală oh kung chờ hờp sơl mơya khà ơruh pơnu tus bal den ờ geh uă.

 Tềng đap bơta geh ngan do, uă đoàn viên kung đơs broă lơh geh cồng nha tàm mpồl lơh broă bơh he dê. Jat hơ̆, nàng broă tam klăc bal, tơrgùm ơruh pơnu ai gơ in geh cồng nha den kờñ pal gĭt loh nùs nhơm, bơta kơ̆p kờñ bơh đoàn viên, ơruh pơnu dê, gĭt loh khi kờñ bơta lơi mờ kờñ geh bơta lơi tŭ tus bal tàm mpồl đoàn, hội. Bơta geh ngan là, tŭ do tài bơh jơnau lơh sa, mpồl đoàn viên, ơruh pơnu pal lòt lơh broă tiah ngài uă ngan kung gơrềng dờng ngan tus broă tam klăc, tơrgùm ơruh pơnu halà bơtàu tơnguh srơh đoàn, hội tàm ală tiah làng bol ơm kis. Den tàng, uă cau tus bal pơrjum đơs là, nàng tam klăc, tơrgùm ơruh pơnu, kờñ pal pơgồp bal srơh đoàn mờ ală srơh sơnđờm mut lơh broă, lơh broă mờ bơtàu tơnguh lơh sa tàm ală tiah dê.

Bi Lê Công Nhận, ơm tàm thôn Tân Tiến, xã Ea Na, kơnhoàl Krông Ana đơs jơnau đơs: Kờñ srơh ơruh pơnu tàm ală tiah bơtàu tơnguh pràn den bol he pal bơtàu tơnguh sơnđờm mŭt lơh broă, lơh mbè lơi mờ ơruh pơnu pal ơm wơl nàng bơt bơtàu ƀòn lơgar tờm, bơtàu tơnguh lơh sa ală tiah sơlơ bơtàu tơnguh hơ̆ sồng geh dùl srơh pràn. Nàng mờ bơtàu tơnguh bè lơh sa, bol he geh ală broă lơh, tơl tiah bol he pal bơcri priă tàm dùl nă cau, dong kờl khi, tơnơ̆ hơ̆ khi lơh geh cồng nha den cau do geh lơh gơ rề làm uă srơh hơ̆ ai ală đoàn viên ơruh pơnu ndai in, bơh hơ̆ hơ̆ sồng lơh geh srơh bè lơh sa.

Cau cih H’Xíu H’Môk- Cau mblàng K’Hạnh