Càr Kon Tum mờ 2 càr Attapư mờ Sê Kông lơgar Lào dê geh bal gùng tiah nhàr lơgar Dà lơgar jòng rlau 154 kơi sồ. Rlau 3 nam do, 3 càr neh lam lơh jăt Jơnau cih kah bè lơh broă bal lơh broă mặt trận lơh geh uă cồng nha niam. Pơn rơ ngan là mblàng yal, yờ tơnguh uă bơta gĭt wă bơh làng bol 3 càr rcang sơndră kòp Kovid-19; Nam tam klăc bal gĭt gơ̆p lơh bơyô bal đah lơgar Việt Nam mờ Lào nam 2022; Bal mờ hơ̆ là lơh jăt geh cồng nha broă lơh pơgồp bal lòt jòi, tơrgùm geh 129 ƀồc ntìng cau ling chơ̆t màng, ling dong kờl is mờ kwang bàng jak chài lơgar Việt Nam chơ̆t phi să tàm lơgar Lào jun rê tàm lơgar iês tơ̆p ƀồc; bơt bơtàu gùng tiah nhàr lơgar ring lơngai, gĭt gơ̆p lơh bơyô, lơh broă bal mờ bơtàu tơnguh...

Tàm dơ̆ pơrjum, Ủy ƀan Mặt trận Dà lơgar Việt Nam càr Kon Tum bal mờ Ủy ƀan Mặt trận lơgar Lào bơt bơtàu dà lơgar 2 càr Attapư mờ Sê Kông neh cribơyai bơta mờng chài lơh broă mặt trận; ring bal pơn jăt tai sền gàr mờ bơtàu tơnguh bơta gĭt gơ̆p jơh nùs, jơh tồr mờ pin dờn. Mặt trận dà lơgar 3 càr pơn jăt tai pơgồp niam broă cribơyai bơta mờng chài lơh broă tàm broă lơh mặt trận; sơlơ tơnguh lơh broă bal tàm ală gah lơh sa, kă bro, khoa họk- kỹ thuật, hòi jà làng bol 2 lơgar lơh jăt broă lơh tam klăc bal jơi bơtiàn tàm broă bơt bơtàu mờ sền gàr kơ̆ kơl jăp Dà lơgar bơh tơl lơgar dê.