VOV4.K’ho- Ngai 05/10, tàm ƀòn dờng Nha Trang, càr Khánh Hoà neh geh bơyai lơh dơ̆ Cribơyai Dà lềng dơ̆ 9 mờ tơngume “Kơlôi sơnơng Khoa họk Dà lềng: Bơt bơtàu nùs nhơm pin dờn mờ lơh geh tiah kơ̆ kơljap”. Broă lơh do bơh Họk viện Ngoaị giao, Đại sứ quán Anh tàm Việt Nam, Kes priă Konrad Adenauer Stiftung (KAS) bơyai lơh bal. Cribơyai Dà lềng dơ̆ 9 gơ hòi gơ jà mờr 200 nă kwang bàng dunia mờ tàm lơgar tus bal tơn mờ pờ tơlik tàm internet.

Anih bơyai lơh dơ̆ cribơyai dà lềng

Phó Giáo sư - Tiến sĩ ồng Nguyễn Chu Hồi, Phó Củ tịc Mpồl broă lơh ka Việt Nam pà gĭt, khoa họk kông nghệ geh gơnoar broă kwơ màng tàm broă bơtàu tơnguh lơh sa, sền gàr gơnoar tờm dà lơgar dê. Nàng gơ gơs dà lơgar pràn bè dà lềng den pal geh khoa họk kông nghệ pa ngan, lơh ka tàm dà lềng geh cồng nha, dà lềng pal geh atbồ tơrgùm bal mờ ală dà lơgar. Phó Giáo sư - Tiến sĩ ồng Nguyễn Chu Hồi sồr, bơh broă cribơyai broă mờ lơgar ndai, ală lơgar bơt bơtàu nùs nhơm pin dờn cíñ trị nàng lơh broă bal jak chài bè dà lềng dờng. Mơkung, lơh anih lơh broă tàm pà bal bè lơh broă bal kơlôi sơnơng jak chài bè dà lềng tiah đah mat tơngai lik.

VOV Tây Nguyên- Cau mblàng K’Hạnh