VOV4.K’ho- Ngai 14/10, tàm Hải Phòng, Tập đoàn Ală jơnau yal dunia tàm Việt Nam (IDG Việt Nam) pơgồp bal mờ Mpồl mblàng yal jơnau sồ Việt Nam bơyai lơh Cribơyai Dà lơgar bè Cíñ phủ sồ nam 2022 mờ tơngume “Broă lơh làng bol sồ, đại họk sồ, lơh broă logistics, bơtàu tơnguh ngui jơnau yal tơngĭt làng bol ơm kis, ù tiah mờ broă lơh tơnguh tam gơl sồ dà lơgar”.

Ală Kwang đơng lam bồ tam gơl sồ pơnrơ ngan nam 2022 

Tàm dơ̆ cribơyai, ală kwang bàng mờng chài gah broă lơh do neh yal tơngĭt jơnau yal bè ngui jơnau yal tơngĭt jơnau làng bol ơm kis, gĭt măt mờ di mờ tŏp ƀăng kị điện tử, broă lơh làng bol sồ, đại họk sồ, kă bro sồ..; yal tơngĭt ală gùng dà broă lơh măy mok yal tơngĭt jơnau pa ngan rlau jơh nàng kờñ bơtàu tơnguh lơh sa sồ, mpồl bơtiàn sồ, wèt tus jơnau kờñ tam gơl sồ dà lơgar tơngai bơh nam 2022- 2025.

Mpồl bơyai lơh neh jàu khà jờng mờ jờng rơ ală Kwang đơng lam bồ tam gơl sồ pơnrơ ngan nam 2022 (CDC Awards). Di tàm dơ̆ do, ƀòn dờng Hải Phòng neh tơlik măt Mpồng yal tơngĭt jơnau ù tiah ƀòn dờng. Mờ bơh anih do, làng bol, mpồl lơh sa kă bro tàm ù tiah ƀòn dờng Hải Phòng dê gơtùi pờ sền tơn tàm internet, sền ală jơnau yal tơngĭt jơnau tờm ngan bè sră wăc rùp ù tiah, yal tơngĭt jơnau bè ù tiah, bơta lơh sră ngui ù...bơh mpồl cau, hìu bơnhă he dê dùl bă ƀươn soh ngan.

Cau cih VOV Tây Nguyên- Cau mblàng Lơ Mu K’Yến