VOV4.K’ho- Drim ngai 10/05, tàm ƀòn dờng Hồ Chí Minh neh geh lơh Cribơyai jơh gùt anih kă bro điện tử Việt Nam nam 2022 mờ tơngume “Kă bro điện tử dong bơtàu tơnguh lơh sa tơnơ̆ tơngai gơbàn kòp dờng”.

Tàm dơ̆ cribơyai, ală kwang bàng đơs là: Kă bro điện tử neh lơh tam gơl uă ngan broă kă bro bơh mpồl lơh sa kă bro dê mờ bơta mờng kwèng blơi phan bơh cau ngui sa dê, ngan là tơnơ̆ tŭ gơbàn kòp dờng Kovid-19. Kă bro điện tử neh bơtàu tơnguh pràn tàm tơngai bơh nam 2020- 2021 mờ yal lài digơlan geh lơh pơgăp 39 tơmàn dolar Mỹ tàm nam 2025. Do kung là gùng dà bơtàu tơnguh kơ̆ kơl jăp tàm broă lơh uă ală gah tăc phan tàm tơngai tus, bulah geh kòp halà ờ.

Kờp tus nggùl nam 2021, Việt Nam geh rlau 8 tơlak nă cau ngui sa lơh tơn tàm internet pa. Tŭ do, ală cau kă bro drà kă bro điện tử dờng uă ngan mìng tàm Hà Nội mờ ƀòn dờng Hồ Chí Minh. Bơh nam 2021 tus tŭ do, khà phan tăc tàm drà kă bro điện tử gơguh bơh 1,5 tus 2 dơ̆ pơndrờm mờ tơngai lài mờ dơ̆ bơtờp kòp.

Cau mblàng Lơ Mu K’Yến