Di dơ̆ tơngkah kir sơn rai 92 nam Ngai tơlik mat Đoàn Ơruh pơnu Kộng sản Hồ Chí Minh, drim do, ngai 17/03, Ƀan Ƀí thư Đoàn Ơruh pơnu Kộng sản Hồ Chí Minh Dà lơgar bơyai lơh  Cribơyai “Jơnau đơs rơnàng kơnòm să- Broă lơh bơh Đoàn dê”.  Cribơyai geh bơyai lơh jat broă lơh pơrjum tơn pơgồp bal mờ pờ tơlik tơn tàm internet tàm tơrbŏ bal mờ ală Tỉñ đoàn, Thàñ đoàn, mpồl gơwèt Đoàn mờ Mpồl Đoàn, Mpồl tàm lơgar ndai.

Cribơyai geh 2 bơnah: bơnah dơ̆ 1 mờ tơngume “Lơh jat niam bơta pràn rơnàng kơnòm să bơt bơtàu dà lơgar pas gơs, chờ hờp” cribơyai bè ală broă lơh tơnguh uă bơta niam, cồng nha broă lơh bơto bơtê; ală srơh lơh broă kăc màng; bơyai lơh bơt bơtàu Đoàn- Đoàn tus bal bơt bơtàu Đảng; pờ ơnàng broă tam klăc bal, tơrgùm bal ơruh pơnu mờ lơh jat nùs nhơm dong kờl is, lam lài, tam klăc bal, bồ tơngoh, bơta khin cha bơh rơnàng kơnòm să dê pơgồp bơnah bơt bơtàu Dà lơgar pas gơs, chờ hờp jat tàm nùs nhơm Pơrjum dờng Đảng gùt lơgar dơ̆ 13 dê. Bơnah dơ̆ 2 mờ tờm ngan là cribơyai ală broă lơh bơh mpồl Đoàn, Hội, Đội tàm broă sền gròi bal, dong kờl bal ơruh pơnu, kơnòm pa tàu mờ kơnòm dềt bơtàu tơnguh tơl làm.