VOV4.K’ho- Cribơyai tìp măt tơm bơh bơr mờ tơngume “Sơlơ tơnguh tai gơnoar broă mpồl lơh broă mpồl bơtiàn dê lơh jăt ătbồ bal tàm broă sền gàr phan kwơ phan tàm dà mờ jơnau sồr bè jòi phan tàm dà tìs mờ kơrnoăt boh lam (IUU) tàm tiah dà lềng rềp kềng gah dà lềng” bơh Tổng kụk Phan tàm dà pơgồp bal mờ Ală mpồl lơh broă ka Việt Nam mờ Broă lơh Bơtàu tơnguh Liên hợp quôk, Kes priă Tiah ơm kis gùt plai ù, Broă lơh dong kờl ai rơndăp broă lơh dềt in bơyai lơh drim ngai 09/06 tàm càr Quảng Ngãi.

Tàm dơ̆ cribơyai, ală cau ătbồ, gơnoar ătbồ ƀòn lơgar mờ làng bol lơh ka tam pà bal bơta mờng chài lơh jăt ătbồ bal tàm broă sền gàr phan kwơ phan tàm dà mờ lơh jăt jơnau sồr bè jòi phan tàm dà tìs mờ kơrnoăt boh lam tàm tiah dà lềng rềp kềng gah dà lềng. Tàm hơ̆, ală mpồl lơh broă mpồl bơtiàn lơh gơnoar broă kwơmàng tàm broă sền gàr phan kwơ phan tàm dà gơ jăt bal mờ broă lơh jăt sền rơcăng sơndră jòi phan tàm dà tìs mờ kơrnoăt boh lam. Đơs tàm dơ̆ cribơyai, ồng Trần Đình Luân, Kwang ătbồ Tổng kụk Phan tàm dà đơs nền, mpồl bơtiàn lơh gơnoar broă kwơmàng ngan tàm broă lơh ătbồ sền gàr ală phan kis ñhơ̆t dà lềng đơs bal.

Cau mblàng Lơ Mu K’Yến