Rlau 150 nă kwang bàng ala măt ală sở, ngàñ càr Lâm Đồng dê, ală cau jak chài, cau kơlôi sơnơng, ală mpồl, mpồl lơh sa kă bro tàm lơgar tus bal. Cribơyai neh lời uă tŭ jiơ yal, sền jơnau cih tă pơgồp jơnau đơs mờ jơnau đơs tă pơgồp gùt dar ală broă bè bơta kwơ măt kă bro ƀòn dờng Festival Bơkàu Dà Làc, ală jơnau gơrềng tus bơta niam nùs bơh năc lòt nhơl dê gơwèt mờ tiah nhơl chờ Dà Làc, broă lơh nhơl chờ ngăc ngar nàng kờñ sơlơ lòt sền nàng gĭt bơh năc lòt nhơl dê tàm ƀòn dờng bơkàu. Đơs tàm dơ̆ cribơyai, ồng Tôn Thiện San, Củ tịc Ủy ƀan Ñân zân ƀòn dờng Dà Làc đơs nền, bơh broă lơh Festival Bơkàu Dà Làc, broă tam bơkàu neh geh jờng rơ mờ đơs nền măt kă bro bơkàu Dà Làc là bơta pràn kờñ pal geh bơcri priă, ngui mờ pơgồp bơnah chồl tơnguh lơh sa mờ tơnguh uă priă jền, khà lơh geh bơh gah lơh bơkàu dê.