VOV4.K’ho- Bơtàu tơnguh lơh sa- mpồl bơtiàn mhar, kơ̆ kơl jăp, jŏ jòng tơl ală bơta jăt tàm tơrgùm jơh bơta pràn nàng bơtàu tơnguh ală gah, broă lơh geh bơta pràn, bơta ƀươn tàm pơrlòng. Bơ̆t bơtàu ƀòn dờng Buôn Ma Thuột là tiah drà tờm bơh tiah Tây Nguyên dê bal mờ dùl ù tiah Tơlir- Pa- Jak chài, tiah drà ngac ngar- mpồng mŭt bơh tiah Tây Nguyên dê mŭt gơrờm bal mờ kơnhoàl ù tiah do mờ dunia.

Do là gùng dà bơtàu tơnguh bơh càr Dăk Lăk dê geh yal tàm Cribơyai tă pơgồp jơnau đơs tàm jơnau yal rơndăp ù tiah càr Dăk Lăk tơngai bơh nam 2021- 2030, wèt sền tus nam 2050 bơh Ủy ƀan Ñân zân càr Dăk Lăk dê bơyai lơh ngai 16/03. Nàng lơh geh bơta bơtàu tơnguh mhar, ală kwang bàng đơs là, càr Dăk Lăk pal lơh mhar tŭ tơngai bơcri priă lơh ală broă, rơndăp broă lơh gơn kơnờm, broă tờm kwơmàng nàng dong tơnguh lơh bal kơnhoàl ù tiah do, ngan là Tiah tờm tàp pràn să jan tiah Tây Nguyên, gùng pleh đah mat tơngai lik ƀòn dờng Buôn Ma Thuột, gùng rơndeh ntoăt răt Buôn Ma Thuột- Nha Trang, gùng tàm tơrbŏ bal Tuy Hoà- Buôn Ma Thuột; Tơrgùm bơtàu tơnguh jak chài mờ măy mok, kwơmàng là măy mok yal tơngĭt jơnau. Bal mờ hơ̆, càr pal geh broă lơh bơto cau lơh broă mờ broă dong kờl gơhòi gơ jà mpồl cau lơh broă jak.

  Cau mblàng Lơ Mu K’Yến