Củ ñiệm Ủy ƀan Sền sơ wì Dà lơgar Trần Cẩm Tú neh jàu pà 50 bơnah phan pà ai ală hìu bơnhă geh dà kơl hề mờ dà lơgar, hìu bơnhă rƀah bơh ƀòn dờng Lào Cai dê; 50 bơnah phan pà ai cau lơh phan geh rài kis kal ke mờ phan pà ai ală mpồl ling phàu crong càr Lào Cai.

Đơs tàm dơ̆ lòt còp, ồng Trần Cẩm Tú jờng rơ uă ngan bơta tam klăc bal, bơta pơnđơl pràn lơh ngan bơh càr Lào Cai dê tàm dùl nam 2023 uă kal ke, bơta lòng. Mơkung sồr kấp ủy, gơnoar atbồ, Mặt trận Dà lơgar, ală mpồl cíñ trị- mpồl bơtiàn ală kấp càr Lào Cai pal tơrgùm đơng lam lơh jat niam Cỉ thị bơh Ƀan Ƀí thư dê bè broă bơyai lơh sa tềp Dà lơgar Giáp Thìn nam 2024; lam lơh jat geh cồng nha ală gùng dà broă lơh bơh Đảng mờ Dà lơgar dê bè broă lơh gàr niam rài kis mpồl bơtiàn, lơh kwơ mpồl bơtiàn, tơn jơh jơgloh, tơrmù rƀah, ngan là ală broă lơh jơnau kờñ Dà lơgar bè bơt bơtàu ƀòn lơgar pa, tơrmù rƀah kơ̆ kơl jăp, bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau mờ tiah kơh bơnơm.