Chu ñàng kah kơlôi Bơtau An Dương Vương, ală kwang bàng tơlik nùs nhơm kah rơngal ală cau rài lài do neh geh dà kơlhề bơ̆t bơtàu mờ sền gàr dà lơgar, răc dan ai dà lơgar in ring lơngai, làng bol in lơngăp lơngai, dà lơgar in dờng pràn pas sơm bơtàu tơnguh.

Cổ Loa là tiah tềl lời wơl kah yau niam chài kwơmàng bơh jơi bơtiàn Việt Nam dê. Sơrlèt rlau gĭt nđờ rbô nam bơ̆t bơtàu mờ sền gàr dà lơgar, Cổ Loa gam prăp gàr, sền gàr geh uă bơta kwơ kah yau, niam chài ờs mờng bơh yau bềng rài kis niam chài is jơi bơtiàn dê. Kwơmàng tàm rài sơnrờp bơ̆t bơtàu dà lơgar, ù tiah Cổ Loa lời wơl uă ngan tài bơh jơnau kah yau khin cha jak chài gơ jăt bal mờ cau kah yau Thục Phán An Dương Vương, cau tàm pơdờn jăt rài Bơtau Hùng dê, geh dà kơlhề crơng gơs lơgar Âu Lạc. Di tàm dơ̆ do, Củ tịc lơgar Võ Văn Thưởng bal mờ kwang bàng đơng lam bồ Dà lơgar mờ ƀòn dờng Hà Nội neh tam chi lời kir sơnrai tàm Tiah tềl lời wơl kah yau Gơlăng Cổ Loa, kơnhoàl Đông Anh.